ចុមយក្ស! PSG, Juventus និង Chelsea តាមទិញកីឡាករកំពុងឡើងកូដម្នាក់ពី Real Madrid

អឺរ៉ុប៖ បើតាមសេចក្ដីរាយការណ៍ Paris Saint-Germain និង Juventus បានចូលខ្លួនទៅប្រជែងជាមួយ Chelsea ក្នុងការតាមប្រមាញ់ទិញខ្សែការពាររបស់ Real Madrid កីឡាករ Achraf Hakimi នៅកំឡុងទីផ្សារដោះដូរខាងមុខ។

Hakimi បានចំណាយរយៈពេល២រដូវកាលជាមួយ Borussia Dortmund ប៉ុន្តែក្រោយចប់រដូវកាលនេះ គេគ្រោងនឹងត្រឡប់ទៅកាន់ទឹកដីអេស្ប៉ាញវិញដើម្បីត្រៀមសម្រាប់រដូវកាល ២០២០-២០២១។

យ៉ាងណាមិញ Chelsea បានធ្វើការទាក់ទងទៅកាន់ក្លិបជើងឯក Champions League ១៣សម័យកាលរួចហើយ ជុំវិញការផ្ទេរ Hakimi ប៉ុន្តែបើតាមសារព័ត៌មាន AS ក្លិប PSG និង Juventus ពេលនេះក៏មានចំណាប់អារម្មណ៍ចង់នាំយកកីឡាករជម្រើសជាតិម៉ារ៉ុករូបនេះផងដែរ។

ក្រោយបង្ហាញទម្រង់លេងលេចធ្លោនៅទឹកដីអាល្លឺម៉ង់ Hakimi មិនត្រឹមតែទាក់ចិត្តក្លិបផ្សេងៗឲ្យចាប់អារម្មណ៍រូបគេនោះទេ សូម្បី Real Madrid ក៏មានបំណងក្នុងការបន្តកុងត្រារយៈពេលវែងឲ្យកីឡាករវ័យ២១ឆ្នាំនេះនៅកីឡដ្ឋាន Santiago Bernabeu ដើម្បីជំនួសកន្លែងរបស់កីឡាករ Dani Carvajal។

គួរឲ្យដឹងដែរថា​ កិច្ចសន្យាបច្ចុប្បន្នរវាង Real Madrid និងកីឡាករ Achraf Hakimi មានសុពលភាពកំណត់ដល់រដូវក្ដៅ ឆ្នាំ២០២២៕

ប្រភព៖ SportsMole