អាមេរិក៖ យោងតាមមន្ដ្រីអាមេរិកចំនួន ៣ រូបបានឲ្យដឹងថា សហគមន៍ស៊ើបការណ៍សម្ងាត់របស់អាមេរិកបានធ្វើសេចក្ដីសន្និដ្ឋាន នៅក្នុងរបាយការណ៍ចម្រុះមួយ ផ្ញើទៅកាន់សេតវិមាន។ នៅក្នុងរបាយការណ៍នោះបាននិយាយថា ប្រទេសចិនបានលាក់បាំងវិសាលភាពនៃការផ្ទុះឡើងនៃវីរុសកូរ៉ូណា នៅក្នុងប្រទេសរបស់ខ្លួន ជុំវិញករណីឆ្លងសរុបនិងស្លាប់នៃជំងឺថ្មីនេះ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សមន្ត្រីទាំងនោះសុំមិនបញ្ចេញឈ្មោះ ដោយសារតែរបាយការណ៍នេះគឺជាការសម្ងាត់ ហើយពួកគេបានបដិសេធ មិននិយាយលម្អិតអំពីខ្លឹមសាររបស់វាទេ។ ប៉ុន្ដែពួកគេបាននិយាយថា ការធ្វើសេចក្ដីរាយការណ៍ជាសាធារណៈរបស់ប្រទេសចិន ស្ដីពីករណីឆ្លងនិងស្លាប់គឺមានចេតនាមិនបង្ហាញ ឲ្យពេញលេញ។
មន្ដ្រីពីរនាក់បាននិយាយថា របាយការណ៍បានសន្និដ្ឋានថា ចំនួនតួលេខដែលបានរាយការណ៍របស់ប្រទេសចិនគឺមិនពិតនោះទេ។ មន្ត្រីម្នាក់បាននិយាយថា របាយការណ៍នេះត្រូវបានទទួលដោយសេតវិមាន កាលពីសប្ដាហ៍មុន។
ការផ្ទុះឡើងនៃជំងឺកូវីដ-១៩បានចាប់ផ្ដើម នៅខេត្ដហ៊ូប៉ី ប្រទេសចិន នៅចុងឆ្នាំ ២០១៩ ប៉ុន្ដែប្រទេសចិនបានរាយការណ៍ជាសាធារណៈតែ ៨២,០០០ ករណី និងអ្នកស្លាប់ ៣,៣០០ នាក់ នេះបើយោងតាមទិន្នន័យចងក្រងដោយសាកលវិទ្យាល័យ Johns Hopkins University។
លោក ត្រាំ បាននិយាយកាលពីថ្ងៃពុធថា ទិន្នន័យវីរុសក្នុងប្រទេសចិន ដែលត្រូវបានគេរាយការណ៍ ហាក់ដូចជាមានភាពល្អប្រសើរ ប៉ុន្ដែលោកមិនបានទទួលរបាយការណ៍ពីអ្នកស៊ើបការណ៍ ដែលនិយាយថា ប្រទេសចិនបានលាក់បាំងវិសាលភាពនៃការផ្ទុះឡើងនោះទេ។
លោកបានបន្ថែមទៀតថា សហរដ្ឋអាមេរិកនិងចិនកំពុងមានទំនាក់ទំនងឥតឈប់ឈរ ហើយទីក្រុងប៉េកាំងនឹងចំណាយថវិកាចំនួន ២៥០ ពាន់លានដុល្លារ ដើម្បីទិញផលិតផលរបស់អាមេរិក។ លោកបាននិយាយអំពីកិច្ចព្រមព្រៀងពាណិជ្ជកម្មសហរដ្ឋអាមេរិកនិងចិនថា៖ «យើងចង់រក្សាវា ពួកគេក៏ចង់រក្សាវា»៕