ចិន៖ បុរសជាជនជាតិចិនម្នាក់ ឈ្មោះ Wu Chuhong រស់នៅខេត្ដ Henan ទើបត្រូវបានគេដោះលែងឲ្យនៅក្រៅឃុំ បន្ទាប់ពីរកឃើញថាពុំមានកំហុស ក្រោយជាប់ពន្ធនាគារអស់រយៈពេល ១៥ ឆ្នាំពីបទបំពុលក្មេងប្រុស ២ នាក់នៅទីក្រុង Shangqiu កាលពីខែ វិច្ឆិកា ឆ្នាំ ២០០៤ កន្លងទៅ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សរម្លឹកកាលពី ១៦ ឆ្នាំមុនជាពេលដែលលោក Wu ត្រូវបានគេចោទប្រកាន់ បន្ទាប់ពីម្សៅដែលលោកប្រើសម្រាប់ធ្វើអាហារឲ្យក្មេងប្រុសទាំងពីរនោះ ត្រូវគេសន្និដ្ឋានថាមានផ្ទុក Tetramine ដែលជាថ្នាំបំពុលសត្វកណ្ដុរប្រភេទខ្លាំង ទើបបណ្ដាលឲ្យក្មេងម្នាក់បានស្លាប់បាត់បង់ជីវិត។ ក្រោយមកលោក Wu ត្រូវបានគេដាក់ការសង្ស័យ ពីព្រោះលោកធ្លាប់មានជម្លោះមួយចំនួនជាមួយនឹងគ្រួសារក្មេងរងគ្រោះ។
រហូតដល់ខែ មិថុនា ឆ្នាំ ២០០៥ លោក Wu ដែលជាជនជាប់ចោទត្រូវបានតុលាការកម្រិតកណ្ដាលប្រចាំទីក្រុង Shangqiu កាត់ទោសឲ្យជាប់ពន្ធនាគារអស់មួយជីវិត ពីបទមនុស្សឃាតដោយចេតនា។ យ៉ាងណាមិញ តុលាការជាន់ខ្ពស់ប្រចាំខេត្ដ Henan ក៏បានចេញដីកាកោះហៅតុលាការថ្នាក់ក្រោម ឲ្យបញ្ជាក់សាលក្រមចំនួនពីរលើកផងដែរ ហើយរហូតដល់ឆ្នាំ ២០០៨ តុលាការជាន់ខ្ពស់ក៏បានអនុម័តសេចក្ដីសម្រេចនេះ។
ទោះជាយ៉ាងណាក៏ដោយ ក្រុមគ្រួសាររបស់ជនជាប់ចោទខាងលើ មិនដែលឈប់តវ៉ាពីភាពគ្មានទោសពៃរ៍របស់លោក Wu ឡើយ រហូតធ្វើឲ្យតុលាការកំពូលនៃប្រទេសចិន បញ្ជាឲ្យតុលាការជាន់ខ្ពស់ខេត្ដ Henan ធ្វើរឿងក្ដីនេះម្ដងទៀត។
នៅទីបំផុត តុលាការបានកាត់ក្ដីលោក Wu ឲ្យរួចផុតពីការជាប់ទោសកាលពីថ្ងៃពុធថ្មីៗនេះ ព្រោះមិនមានភស្ដុតាងគ្រប់គ្រាន់ដែលបញ្ជាក់ពីកំហុស។ ហើយជុំវិញករណីនេះ លោក Wu ក៏នឹងមានសិទ្ធទទួលបានសំណងពីរដ្ឋផងដែរ៕