ចុមខ្លាំងបាត់! ក្លិបយក្សចំនួន ៤ នៅអង់គ្លេសចង់បាន Coutinho ប៉ុន្តែអត់មាន Liverpool

អង់គ្លេស៖ ក្លិបបិសាចក្រហម Manchester United ត្រូវបានរាយការណ៍មកថា កំពុងតែនាំមុខក្លិបនៅក្របខណ្ឌ Premier League ដទៃទៀតក្នុងការនាំយកយក Philippe Coutinho ពីក្លិបអ្នកមានបុណ្យ Barcelona នៅរដូវក្ដៅខាងមុខ។

Coutinho រដូវកាលនេះ បានផ្ញើខ្លួនជាមួយ Bayern Munich ក្រោមកិច្ចសន្យាខ្ចីជើង ដោយរកបានគ្រាប់បាល់៨គ្រាប់ពីការបង្ហាញខ្លួន២២ប្រកួតឲ្យក្លិបជើងឯកអាល្លឺម៉ង់ ប៉ុន្តែភាគីខាងក្លិបមិនមានបំណងក្នុងការទិញផ្ដាច់កុងត្រារបស់គេពីកីឡដ្ឋាន Camp Nou នោះទេ។

បច្ចុប្បន្ន កីឡាករជម្រើសជាតិប្រេស៊ីលនៅសល់កុងត្រារយៈពេល៣ឆ្នាំទៀតជាមួយក្លិបមានមូលដ្ឋាននៅតំបន់កាតាឡាន់ ប៉ុន្តែគេទំនងនឹងមិនអាចស្វែករកកន្លែងលេងពីលោក Quique Setien បានទេនៅរដូវកាលក្រោយ ហើយអាចនឹងចាកចេញនៅទីផ្សារខាងមុខ។

បើតាម Sport ក្លិបបិសាចក្រហម Man UTD បានចាប់អារម្មណ៍ចង់បានខ្សែបម្រើប្រយុទ្ធ Coutinho ទៅចាប់ដៃគូគ្នាជាមួយ Bruno Fernandes។

យ៉ាងណា Man UTD នឹងត្រូវប្រឈមមុខជាមួយក្លិបរួមលីគ៣ទៀតគឺ Leicester City, Tottenham Hotspur និង Chelsea ក្នុងការប្រជែងគ្នានាំយកកីឡាករវ័យ២៧ឆ្នាំខាងលើត្រឡប់មកលេងនៅទឹកដីអង់គ្លេសវិញ៕

ប្រភព៖ DailyMail