អាជ្ញាធរនៅអឺរ៉ុបមួយចំនួនបានហាមមិនឲ្យប្រើប្រាស់ឧបករណ៍សម្រាប់ធ្វើតេស្តរកវីរុស និងម៉ាស់ដែលគ្មានគុណភាពមកពីចិន

យោងតាមអាជ្ញាធរនៅក្នុងប្រទេសអេស្ប៉ាញ តួគី និង ហូឡង់ បានឲ្យដឹងថាឧបករណ៍សម្រាប់ធ្វើតេស្តរកវីរុស និងម៉ាស់វេជ្ជសាស្រ្តរាប់ពាន់មានគុណភាពអន់ជាងកម្រិតស្តង់ដារនឹងមានបញ្ហា។

កាលពីថ្ងៃសៅរ៍ក្រសួងសុខាភិបាលហូឡង់បានប្រកាសថា ខ្លួនបានប្រមូលមកវិញនូវម៉ាស់ចំនួន ៦០០០០០ ម៉ាស់ដែលនាំចូលដោយក្រុមហ៊ុនចិនកាលពីថ្ងៃទី ២១ ខែមីនា ដែលត្រូវបានចែកចាយទៅក្រុមវេជ្ជសាស្ត្រជួរមុខ។

ពួកគេបានបន្ថែមថា ម៉ាស់ទាំងនេះមិនស្របទៅតាមគុណភាពដែលចង់បាននឹងសម្រាប់ប្រើប្រាស់ បើទោះបីជាមានលិខិតធានាពីរដ្ឋាភិបាលចិនយ៉ាងណាក្តី ហើយការដឹកជញ្ជូននានាត្រូវបានផ្អាកភ្លាមៗហើយក៏មិនបានដាក់ប្រើប្រាស់ផងដែរ។

រដ្ឋាភិបាលអេស្ប៉ាញក៏បានជួបប្រទះបញ្ហាស្រដៀងគ្នាជាមួយនឹងឧបករណ៍សំរាប់ធ្វើតេស្តរកវីរុសដែលបានបញ្ជាទិញពីក្រុមហ៊ុនចិន។

ពួកគេបានប្រកាសថា ខ្លួនបានទិញឧបករណ៍សម្រាប់ធ្វើតេស្តរកវីរុសរាប់រយរាប់ពាន់គ្រឿងដើម្បីប្រយុទ្ធប្រឆាំងនឹងវីរុសនេះ ប៉ុន្តែឧបករណ៍ទាំងនេះមិនអាចកំណត់បានត្រឹមត្រូវថាតើអ្នកជំងឺមានវីរុសនោះទេ។

ស្ថានទូតចិនប្រចាំនៅអេស្ប៉ាញបានធ្វើការបង្ហោះសារនៅលើបណ្តាណសង្គម twitter ថាក្រុមហ៊ុនដែលបាននាំចូលឧបករណ៍ទាំងនេះមិនមានអាជ្ញាប័ណ្ណជាផ្លូវការពីអាជ្ញាធរវេជ្ជសាស្ត្រចិនក្នុងការលក់ផលិតផលរបស់ខ្លួនឡើយ។ ហើយពួកគេក៏បានបញ្ជាក់ទៀតថា​ សម្ភារៈដែលមិនមានគុណភាពទាំងនោះគឺដាច់ដោយឡែកពីបរិក្ខារដែលបរិច្ចាគដោយរដ្ឋាភិបាលចិន និង ផលិតផលនៅលើអាលីបាបា​។

តួគីក៏បានប្រកាសផងដែរថា ខ្លួនបានរកឃើញឧបករណ៍ធ្វើតេស្តរកវីរុសមួយចំនួនដែលបញ្ជាទិញពីក្រុមហ៊ុនចិនគឺមិនមានគុណភាព បើទោះបីជាវាបាននិយាយថាការធ្វើតេស្តចំនួន ៣៥០.០០០ មានដំណើរការល្អក៏ដោយ។​ ការចោទប្រកាន់គ្រឿងបរិក្ខារដែលមានបញ្ហាកើតឡើង បន្ទាប់ពីក្រុមអ្នករិះគន់បានព្រមានថាប្រទេសចិនអាចនឹងប្រើការផ្ទុះឡើងនៃមេរោគនេះដើម្បីជះឥទ្ធិពលបន្ថែមទៀត៕