Willian ពោលពាក្យប៉ុន្មានឃ្លា ផ្តល់ក្តីសង្ឃឹមដល់ក្លឹបគីឡូធ្ងន់២ នៅ Premier League ដែលកំពុងតែចង់បានរូបខ្លួន

Willian បានផ្តល់ក្តីសង្ឃឹមដល់ក្លឹបគីឡូធ្ងន់២ Arsenal និង Spurs ក្នុងការប្រជែងយករូបខ្លួន ដោយ Willian បានអះអាងថា ខ្លួននៅតែបន្តលេងនៅ Premier League បើសិនជាខ្លួនចាកចេញពី Chelsea នៅរដូវក្តៅខាងមុខ។

កីឡាករដែលបង្ហាញខ្លួនបាន៣០០ប្រកួត​ គិតចាប់តាំងពីផ្ទេរមក Chelsea តាំងពីឆ្នាំ២០១៣ រូបនេះធ្លាប់បានឈ្នះពាន Premier league ២គ្រឿង ពាន Europa League ១គ្រឿង និងពាន FA Cup ក្នុងអំឡុងពេលរួមរស់ជាមួយ Chelsea ប៉ុន្តែកីឡាកររូបនេះអាចនឹងដាក់គោលដៅចាកចេញពី Chelsea ខណៈដែលកុងត្រារបស់គាត់នឹងត្រូវដាច់នៅចុងរដូវកាលនេះហើយ។

ក្លឹប Arsenal និង Spurs ដែលកំពុងតែចង់បានកីឡាកររូបនេះហាក់មានសង្ឃឹម ក្រោយ Willian បានថ្លែងប្រាប់ ESPN​ យ៉ាងដូច្នេះថា៖ "បំណងប្រាថ្នារបស់ខ្ញុំគឺលេងនៅ Premier League តែខ្ញុំមិនបដិសេធលេងនៅលីគផ្សេងៗទៀតនោះទេ។ ខ្ញុំនឹងបន្តលេងឲ្យ Chelsea រហូតដល់ចប់រដូវកាលនេះ ហើយយើងនឹងឃើញថាអ្វីកើតឡើង ខ្ញុំពិតជាសមខ្លួននឹងទឹកដីអង់គ្លេសណាស់"៕

ប្រភព៖ Metro