គ្រាន់តែរឿង Thoong Saneha ចប់ភ្លាម អ្នកនិពន្ធនិយាយបែបនេះដាក់ Toey Jarinphon តែម្ដង

ថៃ៖ ខ្សែភាគយន្តភាគថៃរឿង Thoong Saneha ដែលទើបនឹងឈានមកដល់ភាគបញ្ចប់កាលពីថ្ងៃអាទិត្យមុន បានក្លាយទៅជារឿងដែលមានចំនួនអ្នកទស្សនាច្រើនជាងគេប្រចាំប៉ុស្តិ៍លេខ៣ សម្រាប់ដើមឆ្នាំ២០២០ នេះ។ ក្នុងនោះ ទាំងតារាសម្ដែង និងសាច់រឿងរបស់ខ្សែភាពយន្តភាគមួយនេះ សុទ្ធ សឹងតែទទួលបានការចាប់អារម្មណ៍ និងគាំទ្រយ៉ាងច្រើនលើសលប់ ជាពិសេសគឺចំពោះតួឯកស្រី ដែលសម្ដែងដោយ Toey Jarinphon។

ក្នុងរឿងនេះ Toey ត្រូវសម្ដែងជាតួអង្គ យុភីន ជាតួអង្គម្នាក់ដែលត្រូវជួបប្រទះនូវព្យុះបោកបក់ក្នុងជីវិតជាច្រើន ជាពិសេសនាងត្រូវបានគេចាត់ទុកជាស្រីស៊ីប្ដី ព្រោះបុរសដែលបានរៀបការជាមួយនាង សុទ្ធ សឹងតែស្លាប់បាត់បង់ជីវិត។

អ្វីដែលកាន់តែពិសេសទៀតនោះ អ្នកនិពន្ធរឿង Thoong Saneha នេះផ្ទាល់ បានបង្ហោះសារដ៏គួរឲ្យចាប់អារម្មណ៍មួយ ដោយបានបង្ហាញពីការយល់ឃើញចំពោះការសម្ដែងរបស់ Toey ដែលមានខ្លឹមសារកោតសរសើរថា Toey គឺសម្ដែងសមខ្លាំង ប្រៀបបីដូចជាតួអង្គ យុភីន ពិតៗនៅក្នុងសៀវភៅប្រលោមលោក និងបានហៅ Toey ថាជាតារាស្រីជួរមុខប្រចាំប៉ុស្តិ៍លេខ៣។

គ្រាន់តែឃើញសារបង្ហោះពីអ្នកនិពន្ធបែបនេះ Toey បានបង្ហាញអារម្មណ៍រំភើបជាខ្លាំង និងបានថ្លែងអំណរគុណដល់អ្នកដឹកនាំ ក៏ដូចជាខាងស្ថានីយ៍ទូរទស្សន៍ដែលបានផ្ដល់ឱកាសឲ្យនាងបានសម្ដែងក្នុងរឿងនេះ៕