រដ្ឋាភិបាលហ្វីលីពីនគ្រោងបង្កើនការនាំចូលអង្ករដើម្បីធានាប្រជាជនខ្លួន ក្នុងពេលមានការរីករាលដាលនៃវីរុស COVID-19

ហ្វីលីពីន៖ នៅថ្ងៃអង្គារនេះមន្ត្រីជាន់ខ្ពស់មួយរូបបានរាយការណ៍ថា រដ្ឋាភិបាលហ្វីលីពីនកំពុងតែស្វែង រកការនាំចូលអង្ករចំនួន ៣០០,០០០ តោន ដើម្បីធានាបាននូវការផ្គត់ផ្គង់ស្បៀងអាហារក្នុងស្រុកគ្រប់គ្រាន់ ខណៈពេលដែលខ្លួនព្យាយាមទប់ស្កាត់ការរីករាលដាលនៃវីរុស COVID-19។

ហ្វីលីពីនបានក្លាយជាប្រទេសនាំចូលអង្ករធំជាងគេបំផុតនៅលើពិភពលោកក្នុងឆ្នាំ ២០១៩ ជាមួយនឹងការទិញដែលបានប៉ាន់ស្មានថាមានចំនួន ២,៩ លានតោន។ ជាធម្មតានាំចូលពីពីប្រទេស វៀតណាម ប៉ុន្តែក៏នាំចូលអង្ករពីប្រទេសថៃផងដែរ។

ប្រទេសវៀតណាមដែលជាប្រទេសនាំចេញអង្ករធំលំដាប់ទី ៣ លើពិភពលោកបានផ្អាកកិច្ចសន្យានាំចេញអង្ករជាបណ្តោះអាសន្ន ខណៈពេលដែលកំពុងធ្វើការពិនិត្យឡើងវិញនូវឃ្លាំងស្តុករបស់ខ្លួនដើម្បីធានាថា ខ្លួនមានការផ្គត់ផ្គង់ក្នុងស្រុកគ្រប់គ្រាន់ ដើម្បីទប់ទល់នឹងការផ្ទុះឡើងនៃមេរោគនេះ។

លេខាធិការគណៈរដ្ឋមន្រ្តីលោក Karlo Nograles បានមានប្រសាសន៍ថា ក្រុមការងារអន្តរទីភ្នាក់ ងាររបស់ហ្វីលីពីនស្តីពីជំងឺឆ្លងដែលកំពុងលេចឡើងបានស្វែងរកការយល់ព្រមពីលោកប្រធានាធិបតី Rodrigo Duterte សម្រាប់ការរៀបចំការទិញស្រូវ។ តម្រូវការអង្កររបស់ហ្វីលីពីនបានកើតឡើងចំពេលដែលតម្លៃស្រូវកាន់តែថ្លៃជាពិសេសមកពីប្រទេសថៃ។

ប្រទេសកម្ពុជាក៏នឹងបិទការនាំចេញអង្ករមួយចំនួនផងដែរ ដើម្បីធានាសន្តិសុខស្បៀងអាហារក្នុងតំបន់ក្នុងកំឡុងពេលមានវិបត្តិវីរុសនេះ។

កាលពីសប្តាហ៍មុនរដ្ឋមន្រ្តីក្រសួងកសិកម្មលោក William Dar បានធានាដល់ប្រជាជនហ្វីលីពីនថាប្រទេសនេះមានអង្ករគ្រប់គ្រាន់សម្រាប់រយៈពេល ៤ ខែបន្ទាប់ដោយគិតគូរពីស្តុករដ្ឋបច្ចុប្បន្នការប្រមូលផលរដូវប្រាំងក្នុងស្រុកនិងការបន្តនាំចូល។

ការព្រួយបារម្ភអំពីសន្តិសុខស្បៀងអាហារពិភពលោកកំពុងតែកើនឡើង ខណៈដែលរដ្ឋាភិបាលមួយចំនួនកំពុងគិតពិចារណាអំពីការរឹតត្បិតលំហូរចំណីអាហារ ដែលមានប្រជាជនប្រមាណមួយភាគប្រាំនៃចំនួនប្រជាជនពិភពលោកដែលកំពុងជាប់គាំងដើម្បីប្រយុទ្ធប្រឆាំងនឹងការរីករាលដាលនៃជំងឺឆ្លង៕