គួរឲ្យរន្ធត់!​ បុរសម្នាក់ត្រូវខ្លាមួយក្បាលខាំសម្លាប់នៅក្នុង​ឧទ្យាន​ជាតិមួយកន្លែងនៅប្រទេសថៃ

ថៃ៖ សត្វខ្លាព្រៃមួយក្បាលត្រូវបានគេជឿថា បានខាំសម្លាប់បុរសម្នាក់ដែលបានទៅបង្កសំឡេងរំខាននៅក្នុងព្រៃពេលកំពុងបោះជំរុំជាមួយមិត្តភក្តិពីរនាក់នៅឧទ្យានជាតិថាបឡានក្នុងស្រុកវ៉ាងណាំឃី។

លោក Prawatsart Chanthep ប្រធានឧទ្យានជាតិ Thap Lan បានឲ្យដឹងថាក្រុមស្រាវជ្រាវបានចាប់ផ្តើមស្វែងរកលោក Jamras Phumwaengkuang អាយុ ៤៥ ឆ្នាំ ជនជាតិថៃ កាលពីថ្ងៃចន្ទបន្ទាប់ពីមិត្តភក្តិពីរនាក់បានរាយការណ៍ថា គាត់បានបាត់ខ្លួនប្រហែលជាត្រូវបានវាយប្រហារ និងអូសយកទៅដោយសត្វ។

ម៉ោងប្រហែល ៦ ល្ងាចពួកគេបានប្រទះឃើញសពរបស់គាត់នៅឧទ្យានជាតិខាងកើតភូមិ ស៊ុកសំប៊ុន ។ ជើងខាងស្តាំរបស់គាត់ត្រូវបានខាំផ្តាច់ និងមានស្នាមរបួសធំនៅលើក្បាលរបស់គាត់។ សាកសពរបស់គាត់ត្រូវបានបញ្ជូនទៅមន្ទីរពេទ្យវ៉ាងណាំឃីឃីដើម្បីធ្វើកោសល្យវិច័យ។

នៅក្នុងព្រៃពួកគេបានបោះជំរុំតូចមួយដើម្បីគេងនៅទីនោះមួយយប់ ហើយនៅព្រឹកថ្ងៃអាទិត្យ ខណៈពេលកំពុងរៀបចំអាហារពេលព្រឹក ពួកគេបានលឺសំឡេងសត្វស្រែកខ្លាំងៗ នៅក្បែរនោះ ហើយគិត ថាវាជាសត្វខ្លា បន្ទាប់មកជនរងគ្រោះបានដើរចេញពីទីជំរុំ និងចូលព្រៃដើម្បីរកមើលសំឡេងហើយមិនបានត្រឡប់មកវិញនោះទេ។

ក្រោយមកគ្នារបស់គាត់ដែលនៅសល់បានទៅការិយាល័យឧទ្យានជាតិ ហើយបានរាយការណ៍អំពីការបាត់ខ្លួនរបស់គាត់ដោយស្នើសុំឱ្យមានការស្វែងរកសម្រាប់គាត់។

លោក Prawatsart បានកំពុងតែស៊ើបអង្កេតលើបុរសពីរនាក់បន្ថែមទៀតដោយគាត់សង្ស័យថាពួកគេមិនបានចូលព្រៃដើម្បីលម្ហែកាយឬទៅដកប្រទាលកន្ទុយក្រពើទេ ប៉ុន្តែគិតថាពួកគេអាចនឹងកំពុងតែដើរបរបាញ់ កាប់ឈើផៃយ៉ុងឬឈើគ្រញូងដែលត្រូវបានការពារដោយច្បាប់៕