ទុក្ខឥតល្ហែ! ជំងឺកូវីដ-១៩ មិនទាន់បាត់ផង ពេលនេះរថភ្លើងដឹកអ្នកដំណើរជិត ៧០០ នាក់របស់ចិន ត្រូវក្រឡាប់ទៀត (មានវីដេអូ)

ចិន៖ មនុស្សយ៉ាងហោចណាស់ម្នាក់បានស្លាប់ និង ១២៧ នាក់ទៀតរងរបួស ក្នុងឧបទ្ទវហេតុដែលរថភ្លើងផ្ទុកអ្នកដំណើរជិត ៧០០ នាក់មួយគ្រឿងបានបើករអិលធ្លាក់ផ្លូវនៅឯទីក្រុង Chenzhou ខេត្ដហ៊ូណាន ភាគខាងត្បូងប្រទេសចិន កាលពីថ្ងៃទី ៣០ ខែ មីនា ម្សិលមិញនេះ។

នៅមុនកើតហេតុ រថភ្លើងដែលកំពុងដឹកអ្នកដំណើរចំនួន ៦៥៤ នាក់នេះបានធ្វើដំណើរពីទីក្រុង Jinan ឆ្ពោះទៅទីក្រុង Guangzhou ភាគខាងត្បូងប្រទេសចិន ដោយរត់បានចម្ងាយ ១,៩៩៨ គីឡូម៉ែត្រ និងចំណាយពេលជិត ២៤ ម៉ោង។ តែសំណាងមិនល្អ នៅពេលរថភ្លើងជិតទៅដល់គោលដៅ ក៏ស្រាប់តែផ្ទៃដីនៅត្រង់ចំណុចកើតហេតុនោះ មានការបាក់ស្រុត ហើយពេលនោះអ្នកបញ្ជាក្បាលម៉ាស៊ីន រអិលជើងពុំអាចជាន់ហ្រ្វាំងបាន ដែលជាហេតុបណ្ដាលឲ្យទូរថភ្លើងចំនួន ៥ កំណាត់ត្រូវក្រឡាប់ផ្ងារជើងតែម្ដង។

ករណីនេះ បានបង្កជាអគ្គិភ័យឆាបឆេះមានផ្សែងសន្ធោសន្ធៅ  ដែលបណ្ដាលឲ្យអ្នកដំណើរទាំងអស់ព្យាយាមរំដោះខ្លួនចេញតាមរបៀបផ្សេងៗគ្នា និងមានអ្នកខ្លះលោតចេញតាមបង្អួចទៀតផង។ ដែលអគ្គិភ័យនេះ បានឆាបឆេះជាងពីរម៉ោង ហើយបានរលត់ទៅវិញ ក្រោមស្នាដៃអ្នកពន្លត់អគ្គិភ័យជិត ១៥០ នាក់ និងប្រើរថយន្ដពន្លត់អគ្គិភ័យអស់ចំនួន ២៨ គ្រឿង។

ជុំវិញហេតុការណ៍នេះ ក៏បានធ្វើឲ្យមន្ដ្រីប៉ូលិសផ្លូវដែកម្នាក់ស្លាប់ និងបុគ្គលិក ៤ នាក់ទៀតរងរបួស ខណៈអ្នកដំណើរ ៤ នាក់បានរងរបួសធ្ងន់ និង ១១៨ នាក់ផ្សេងទៀតរងរបួសស្រាល ហើយអ្នកទាំងអស់នោះត្រូវបានគេបញ្ជូនទៅកាន់មន្ទីរពេទ្យភ្លាមៗ។

សូមទស្សនាវីដេអូខាងក្រោម៖