ប្រទេសញូហ្សេឡែន មានអ្នកស្លាប់ករណីទី១ ពីជំងឺ កូវីដ១៩

ប្រទេសញូហ្សេឡែន៖ ញូហ្សេឡែនមានករណីស្លាប់លើកដំបូងដែលទាក់ទងនឹងវីរុសកូវីដ១៩ កើតឡើង បន្ទាប់ពីមានអ្នកឆ្លងកើនឡើងរ​ហូតដល់ទៅ ៥១៤ ករណី នេះបើតាមសម្តីរបស់នាយកមន្ទីរសុខាភិបាល លោក Ashley Bloomfield កាលពីថ្ងៃអាទិត្យ។ ហើយស្ត្រីដែលបានស្លាប់នោះមានអាយុជាង ៧០ឆ្នាំ​ និងបានកើតជំងឺផ្តាសាយផងដែរ។ 

ស្ត្រីរូបនេះត្រូវបានគេដឹងថាមានផ្ទុកវីរុសកូវីដ១៩ កាលពីថ្ងៃសុក្រពេលព្រឹក ហើយបានស្លាប់នៅមន្ទីរពេទ្យ Greymouth ពីរថ្ងៃកន្លងមក ហើយគេសង្ស័យថា គាត់បានឆ្លងវីរុសកូវីដ១៩ ពីក្រៅប្រទេស មក។

គួរបញ្ជាក់ផងដែរថា ប្រទេសញូហ្សេឡែនបានដាក់ប្រទេសក្នុងគ្រាអាសន្នកាលពីថ្ងៃពុធ ខណៈដែលរដ្ឋាភិបាលឲ្យប្រជាជននៅដាច់ដោយឡែកពីគ្នា រួមទាំងការបិទសេវាមិនចាំបាច់ សាលារៀន និងការិយាល័យរយៈពេលមួយខែផងដែរ៕