ប៉ាណាម៉ា៖ ក្រុមហ៊ុនដឹកអ្នកដំណើរបាននិយាយកាលពីថ្ងៃសុក្រថាអ្នកដំណើរ ៤ នាក់បានស្លាប់ នៅលើនាវា ទេសចរណ៍មួយដែលផ្ទុកមនុស្សជាច្រើន ដែលមានរោគសញ្ញាដូចជំងឺផ្តាសាយ។ ខណៈនាវានោះ បានជាប់គាំងនៅឆ្នេរសមុទ្រប៉ាស៊ីហ្វិកនៃអាមេរិកខាងត្បូងអស់រយៈពេលជាច្រើនថ្ងៃ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សនាវាទេសចរណ៍ Zaandam ដែលមានអ្នកដំណើរចំនួន ១,៨០០ នាក់នៅលើនាវា បច្ចុប្បន្នស្ថិតនៅក្នុងដែនទឹកនៃប្រទេសប៉ាណាម៉ា ដោយត្រូវបានរារាំងមិនអោយចូលចតនៅក្នុង ប្រទេសមួយចំនួនដោយសារតែការភ័យខ្លាចនៃជម្ងឺ Covid-១៩។
ក្រុមហ៊ុនដែលគ្រប់គ្រងដោយប្រទេសហូឡង់បានបញ្ជាក់ថា៖ “ ជើងធ្វើដំណើរហូឡង់-អាមេរិច អាចបញ្ជាក់បានថាភ្ញៀវចាស់ៗចំនួន ៤ នាក់បានស្លាប់នៅលើនាវា Zaandam” ។
ក្រុមហ៊ុនខាងលើបន្ថែមថា កាលពីម្សិលមិញអ្នកជម្ងឺមួយចំនួនដែលមានរោគសញ្ញាផ្លូវដង្ហើមត្រូវបានធ្វើតេស្តិ៍រកជម្ងឺ Covid-១៩ និងមានបុគ្គលពីរនាក់ត្រូវបានធ្វើតេស្ត៍វិជ្ជមាន។
ជាការកត់សម្គាល់ នាវាទេសចរណ៍ Zaandam បានចាកចេញពីទីក្រុង Buenos Aires កាលពីថ្ងៃទី ៧ ខែមីនាហើយត្រូវបានគេសន្មត់ថា នឹងមកដល់ San Antonio នៅថ្ងៃសៅរ៍ ដែលនៅជិត Santiago ក្នុងប្រទេសឈីលី។
ចាប់តាំងពីការឈប់សំចតនៅ Punta Arenas ក្នុងប្រទេសឈីលី កាលពីថ្ងៃទី ១៤ ខែមីនា នាវានេះត្រូវបានគេបង្វែរចេញពីកំពង់ផែជាច្រើន បន្ទាប់ពីមានសេចក្តីរាយការណ៍ថាមនុស្សចំនួន ៤២ នាក់នៅលើនាវាបានបង្ហាញរោគសញ្ញាដូចជាជម្ងឺផ្តាសាយ។ នាវានេះកំពុងព្យាយាមធ្វើដំណើរ ឆ្ពោះទៅរដ្ឋផ្លរីដា ប៉ុន្តែដើម្បីទៅដល់ទីនោះវាត្រូវឆ្លងកាត់ប្រឡាយប៉ាណាម៉ា ។
កាលពីថ្ងៃសុក្រ អាជ្ញាធរបានបដិសេធមិនអោយនាវានេះចូលទៅកាន់ច្រកផ្លូវទឹកនេះទេ។ ក្រុមហ៊ុនហូឡង់-អាមេរិច មួយនេះ បានបញ្ជូននាវាទេសចរណ៍មួយគ្រឿងទៀតឈ្មោះ Rotterdam ដែលដឹកឧបករណ៍ធ្វើតេស្ត គ្រឿងផ្គត់ផ្គង់ និងបុគ្គលិកផ្តល់ជំនួយសង្គ្រោះទៅជួបនាវា Zaandam ក្នុងដែនទឹករបស់ប្រទេសប៉ាណាម៉ា។
ក្រុមហ៊ុនបាននិយាយថាភ្ញៀវចំនួន ៥៣ នាក់ក្នុងចំណោមភ្ញៀវ ១,២៤៣ នាក់និង ៨៥ នាក់ក្នុងចំណោមបុគ្គលិក ៥៨៦ នាក់នៅលើនាវា Zaandam បានរាយការណ៍ទៅមជ្ឈមណ្ឌលវេជ្ជសាស្ត្ររបស់នាវាថាមាន រោគសញ្ញាដូចជាគ្រុនផ្តាសាយ។ នាវានេះគ្រោងនឹងផ្ទេរអ្នកដំណើរទាំងនោះដែលមិនមានជម្ងឺ។
ក្រុមហ៊ុន ហូឡង់-អាមេរិចបាននិយាយថា៖ "ខណៈពេលដែលផែនការឆ្ពោះទៅមុខសម្រាប់ នាវាទាំងពីរនៅតែត្រូវបានបញ្ចប់ យើងនៅតែបន្តធ្វើការជាមួយអាជ្ញាធរប៉ាណាម៉ា លើការយល់ព្រមដើម្បីអោយឆ្លងកាត់ប្រឡាយប៉ាណាម៉ាសម្រាប់ការបើកនាវាទៅចតនៅ Fort Lauderdale ក្នុងរដ្ឋផ្លរីដា" ។
កាលពីថ្ងៃពុធ រដ្ឋមន្រ្តីក្រសួងសុខាភិបាលប៉ាណាម៉ាលោក Rosario Turner បាននិយាយថានាវា Zaandam នឹងត្រូវបានអនុញ្ញាតអោយឆ្លងកាត់ប្រឡាយនេះ។ ប៉ុន្តែនៅព្រឹកថ្ងៃសុក្រនេះ អ្នកគ្រប់គ្រងផ្នែកសមុទ្ររបស់ប៉ាណាម៉ាលោក Ricaurte Vasquez បាននិយាយថាក្រសួងសុខាភិបាល បានបដិសេធការធ្វើដំណើរចូលទៅក្នុងប្រឡាយទៅវិញ៕