កីឡាករចាស់វស្សានៅ Chelsea ម្នាក់សង្ឃឹមថានឹងអាចបន្តរួមរស់ជាមួយក្លឹបទៀត

ខ្សែប្រយុទ្ធសញ្ជាតិអេស្ប៉ាញ Pedro ត្រូវបានគេនិយាយថានឹងចាកចេញពី Chelsea នៅចុងរដូវកាលនេះ ខណៈដែលកុងត្រារបស់គាត់ជាមួយក្លឹបនឹងដាច់នៅចប់រដូវកាលនេះដូចគ្នា។ 

ទាក់ទិននឹងរឿងនេះ Pedro ផ្ទាល់បាននិយាយពាក្យក្នុងចិត្តថា គាត់នៅតែចង់បន្តរួមរស់ជាមួយ Chelsea នៅ Premier League ទៀត បើទោះជាអនាគតរបស់គាត់ហាក់នៅស្រពេចស្រពិលនៅឡើយ។

កីឡាករតំបន់ប្រយុទ្ធវ័យ៣២ឆ្នាំរូបនេះបានថ្លែងប្រាប់ប្រព័ន្ធព័ត៌មានរបស់ក្លឹបផ្ទាល់បែបនេះថា៖ "ដូចជាអ្នករាល់គ្នាដឹងហើយថា កុងត្រារបស់ខ្ញុំនឹងដាច់នៅខែ៥ តែខ្ញុំមិនទាន់បានជជែកជាមួយក្លឹបនៅឡើយ ថាតើត្រូវសម្រេចយ៉ាងណា បន្តកុងត្រាថ្មី ឬចាកចេញ។"

Pedro បន្ត៖ "ខ្ញុំបានឃើញអ្នកគាំទ្រ Chelsea បង្ហោះជាច្រើន ដោយនិយាយពាក្យលា និងអរគុណខ្ញុំសម្រាប់ពេលវេលាដែលខ្ញុំបានជួយ Chelsea។ នេះជារឿងដែលគួរឲ្យសរសើរមែនទែន ប៉ុន្តែខ្ញុំសូមប្រាប់ទៅអ្នកគាំទ្រទាំងអស់គ្នាថា កុងត្រារបស់ខ្ញុំជិតផុតហើយ ប៉ុន្តែខ្ញុំនៅតែអាចជជែកជាមួយក្លឹបបាន ។ ក្តីសង្ឃឹមរបស់ខ្ញុំ គឺចង់ឲ្យអាចបន្តនៅ Chelsea បាន ប៉ុន្តែពិតណាស់ យើងមិនដឹងទេថា នឹងមានរឿងអ្វីកើតឡើង ខ្ញុំត្រូវតែនិយាយជាមួយក្លឹប ហើយយើងនឹងដឹងថា មានអ្វីកើតឡើង។"

គួររំលឹកផងដែរថា Pedro បានបង្ហាញខ្លួនបាន១៨ប្រកួតឲ្យ Chelsea ក្នុងរដូវកាលនេះ ព្រមទាំងបានរកគ្រាប់បាល់បាន២គ្រាប់ និងជួយឲ្យក្រុមឡើងឈរ Top 4 កំពូលតារាង ខណៈដែលរដូវកាល Premier league ត្រូវជាប់គាំងដោយសារ Covid-19៕

ប្រភព៖ onefootball