ស្ថានទូតខ្មែរប្រចាំប្រទេសថៃ៖ លើកលែងការផាកពិន័យលើ​ពល​ករ​ខ្មែរ ដែលផុត​សុពល​ភាព​ស្នាក់នៅ

ស្ថានទូតខ្មែរប្រចាំប្រទេសថៃ បានបញ្ជាក់ឲ្យពលករខ្មែរបន្តស្នាក់នៅជាបណ្តោះអាសន្ននៅប្រទេសថៃ ដល់ថ្ងៃទី ៣០ មិថុនា ដោយលើកលែងការផាកពិន័យលើការស្នាក់នៅលើសកំណត់ ​(Over Stay)។

ការបញ្ជាក់របស់ស្ថានទូតយ៉ាងដូច្នេះធ្វើឡើង ដោយស្ថាប័នខាងលើអះអាងថា ក្នុងស្ថានភាពនៃការរីករាលដាល​កូវីដ១៩ រដ្ឋាភិបាលថៃបានប្រកាសដាក់ប្រទេសក្នុងគ្រាអាសន្នចាប់ពីថ្ងៃ២៦មីនា ដល់៣០មេសា ២០២០ ដោយមិនអនុញ្ញាត​ឲ្យមានអ្នកធ្វើដំណើរឆ្លងកាត់តាមច្រកព្រំដែនកម្ពុជា និងថៃនោះទេ ដែលជាហេតុធ្វើ​ឲ្យពលករ​ខ្មែរមួយចំនួន ប្រឈមនឹងការផុតសុពលភាពស្នាក់នៅ និងផុតសុពលភាពប័ណ្ណអនុញ្ញាតការងារ។

ក្នុងលិខិតចុះថ្ងៃ ២៦ មីនា ស្ថានទូតខ្មែរប្រចាំប្រទេសថៃបានបន្ថែមថា ក្នុងករណីពលករខ្មែរ ត្រូវការធ្វើការបន្ត ត្រូវឲ្យនិយោជកបញ្ជូនបញ្ជីឈ្មោះទៅក្រសួង ឬមន្ទីរការងារតាមរយៈប្រព័ន្ធអនឡាញត្រឹមថ្ងៃទី៣១ មីនា ដើម្បីបន្តធ្វើការជាណ្តោះអាសន្នរហូតដល់ថ្ងៃទី៣០ មិថុនា ២០២០៕