អីយ៉ាស! Mourinho ចង់បានកីឡាករឆ្នើមម្នាក់របស់ Inter មកពង្រឹងក្រុមនៅរដូវក្ដៅខាងមុខ

អ៊ីតាលី៖ យោងតាមសេចក្ដីរាយការណ៍បានឲ្យដឹងថា ក្លិបមាន់ខ្នាយមាស Tottenham Hotspur មានចំណាប់អារម្មណ៍ក្នុងការនាំយកខ្សែការពារចាស់វស្សាកីឡាករ Diego Godin មកកាន់ទីក្រុងឡុងដ៍នៅរដូវក្ដៅខាងមុខ បន្ទាប់ពីអ្នកចាត់ការទូទៅលោក Jose Mourinho នៅតែចិញ្ចឹមចិត្តចង់បានជម្រើសអ៊ុយរ៉ាហ្កាយ។

លោក Mourinho ក៏ធ្លាប់ព្យាយាមចែចូវយក Godin មកកាន់កីឡដ្ឋាន Old Trafford ម្ដងរួចមកហើយ កាលពីគាត់នៅដឹកនាំក្លិបបិសាចក្រហម Manchester United។

គ្រូបង្គោលក្រុម Inter លោក Antonio Conte បានចុះកុងត្រាយកខ្សែការពាររូបនេះពីក្លិប Atletico Madrid កាលពីរដូវក្ដៅឆ្នាំមុន ប៉ុន្តែដោយសារតែទម្រង់លេងរបស់កីឡាករវ័យ៣៤ឆ្នាំ មិនល្អគ្រប់គ្រាន់អាចទាក់ចិត្តគ្រូបង្វឹកសញ្ជាតិអ៊ីតាលី ពេលនេះក្លិបមានគម្រោងបញ្ចេញគាត់ទៅវិញហើយ។

Godin បង្ហាញខ្លួនឲ្យ Inter ក្នុងក្របខណ្ឌ​ Serie A បាន១៧ប្រកួត ហើយបើយោងតាមការចុះផ្សាយរបស់កាសែត Tuttosport លោក Mourinho បច្ចុប្បន្នកំពុងតាមដានយ៉ាងយកចិត្តទុកដាក់ ពីស្ថានភាពរបស់ខ្សែការពារវ័យចំណាស់ នៅឯកីឡដ្ឋាន San Siro។

យ៉ាងណាមិញ គ្រូបង្គោលក្រុម ​Spurs ទំនងជាអាចប្រឈមនឹងការប្រជែងជាមួយក្លិប Valencia ដែលជាបេក្ខភាពឈានមុខគេក្នុងការចុះកុងត្រាយក Godin បន្ទាប់ពីអតីតប្រធានក្រុម At Madrid រូបនេះ ធ្លាប់បង្ហើបថា ចង់វិលត្រឡប់ទៅលេងនៅអេស្ប៉ាញវិញ៕

ប្រភព៖ football-italia