គិតមកត្រឹមពេលនេះ អាមេរិកគឺជាប្រទេសដែលមានអ្នកឆ្លងជំងឺកូវីដ-១៩ ច្រើនជាងគេបំផុត នៅលើពិភពលោក

អាមេរិក៖ ឥឡូវនេះ សហរដ្ឋអាមេរិកមានករណីនៃការឆ្លងវីរុសកូរ៉ូណាប្រភេទថ្មី ច្រើនជាងប្រទេសដទៃទៀត ដែលមានការធ្វើតេស្ដវិជ្ជមានចំនួន ៨៣,៥០០។

យោងតាមតួលេខចុងក្រោយបង្អស់ ដែលត្រូវបានប្រកាសដោយសាកលវិទ្យាល័យ Johns Hopkins University សហរដ្ឋអាមេរិកបានវ៉ាដាច់ប្រទេសចិន (៨១,៧៨២ ករណី) និងអ៊ីតាលី (៨០,៥៨៩ ករណី)។ ប៉ុន្ដែសហរដ្ឋអាមេរិកមានចំនួនអ្នកស្លាប់ ១,២០០ នាក់ ដោយសារជំងឺកូវីដ-១៩ ដោយតួលេខនេះស្ថិតនៅពីក្រោយប្រទេសចិន (៣,២៩១ នាក់) និងអ៊ីតាលី (៨,២១៥ នាក់)។

ព្រឹត្ដិការណ៍ដ៏គួរឲ្យរន្ធត់នេះ បានកើតឡើងនៅពេលដែល លោកប្រធានាធិបតី ដូណាល់ ត្រាំ បានព្យាករណ៍ថា ប្រទេសជាតិនឹងវិលត្រឡប់ទៅភាពប្រក្រតីវិញ ក្នុងពេលឆាប់ៗនេះ។

អនុប្រធានាធិបតីអាមេរិក លោក Mike Pence បាននិយាយថា ការធ្វើតេស្ដរកវីរុសឆ្លងថ្មីនេះ ត្រូវបានរកឃើញនៅគ្រប់ ៥០ រដ្ឋ ហើយការធ្វើតេស្ដជាង ៥៥២,០០០ ត្រូវបានធ្វើឡើងនៅទូទាំងប្រទេស៕