Hazard ទម្លាយពាក្យក្នុងចិត្តក្រោយមិនគាប់ប្រសើរក្នុងរដូវកាលដំបូងជាមួយ Real Madrid

កីឡាករសញ្ជាតិបេលហ្សិក Eden Hazard បានទម្លាយឲ្យដឹងថា គាត់មានរដូវកាលដំបូងដ៏អាក្រក់មួយជាមួយ Real Madrid តែកីឡាកររូបនេះជឿជាក់ច្បាស់ក្នុងការអភិវឌ្ឍខ្លួនដើម្បីធ្វើឲ្យបានល្អនៅរដូវកាលក្រោយៗទៀត។

Hazard ត្រូវបាន Real Madrid ជះលុយ ៨៨លានផោន ទិញយកមកជួយនៅតំបន់ប្រយុទ្ធ តែកីឡាករកររូបនេះហាក់មិនបានបង្ហាញខ្លួនឲ្យល្អដូចកាលដែលខ្លួនលេងឲ្យ Chelsea នោះឡើយ បូករួមទាំងរបួសរ៉ាំរ៉ៃទៀតផងនោះ។

ទាក់ទិននឹងរឿងនេះ Hazard បានថ្លែងប្រាប់ RTBF ថា៖ "រដូវកាលដំបូងរបស់ខ្ញុំនៅ Real Madrid គឺអាក្រក់ខ្លាំងណាស់ ប៉ុន្តែគ្រប់យ៉ាងមិនមែនសុទ្ធតែអាក្រក់ទាំងអស់នោះទេ។ វាជារដូវកាល ដែលយើងរៀនសូត្រ ហើយនឹងដឹងលទ្ធផលនៅរដូវកាលទី២ វាអាស្រ័យលើខ្ញុំក្នុងការបង្ហាញខ្លួនឲ្យបានល្អនៅរដូវកាលក្រោយ។"

កីឡាករវ័យ២៩ឆ្នាំរូបនេះបានបន្តថា៖ "នេះជាក្រុមល្អមួយ ខ្ញុំបានស្គាល់មនុស្សថ្មីៗ សម្រាប់ខ្ញុំវាជាបទពិសោធន៍ដ៏អស្ចារ្យ ខ្ញុំនៅសល់កុងត្រា៤ឆ្នាំទៀតជាមួយក្លឹប ខ្ញុំសង្ឃឹមថាខ្ញុំនឹងមានទម្រង់លេងល្អឡើងវិញ"។

គួររំលឹកផងដែរថា Eden Hazard បានបង្ហាញខ្លួនឲ្យ Real Madrid បាន១៥ប្រកួតក្នុងរដូវកាលនេះ ដោយបានរកគ្រាប់បាល់១គ្រាប់ នឹងបញ្ជូនបាល់ឲ្យមិត្តរួមក្រុមស៊ុតបាន៥គ្រាប់៕

ប្រភព៖ onefootball