ព្រោះតែកូវីដ-១៩! ធ្វើឲ្យកូនកំលោះក្រមុំឥណ្ឌា៤គូរៀបការដោយគ្មានភ្ញៀវចូលរួម

ឥណ្ឌា៖ បណ្ដាប្រជាជាតិនៅទ្វីបអាស៊ី តែងចាត់ទុកពិធីរៀបអាពាហ៍ពិពាហ៍ ជារឿងដ៏សំខាន់បំផុតនៅក្នុងជីវិតរបស់ពួកគេ ដោយមិនអាចអត់បានដូចជា ជនជាតិឥណ្ឌាជាដើម ដោយពួកគេរៀបចំពិធីនេះមានរយៈពេលជាច្រើនថ្ងៃ តែចំពេលរដ្ឋាភិបាលប្រកាសដាក់ប្រទេសក្នុងគ្រាអាសន្នបែបនេះ ទើបធ្វើឲ្យពួកគេប្រឈមនឹងការលំបាកយ៉ាងខ្លាំង ដោយគ្មានអ្នកចូលរួម។

រហូតមកដល់ពេលនេះ ប្រទេសឥណ្ឌាកំពុងធ្វើសង្រ្គាមយ៉ាងខ្លាំងក្លាជាមួយនឹងសត្រូវលាក់ខ្លួន ហើយរដ្ឋាភិបាលក៏បានប្រកាសដាក់ប្រទេសទាំងមូលនៅក្នុងគ្រាអាសន្ន ដោយបិទមិនឲ្យប្រជាពលរដ្ឋនៅទូទាំងប្រទេសធ្វើដំណើរចេញពីផ្ទះ។ នេះជាវិធានការដ៏ល្អ សម្រាប់ការទប់ស្កាត់នូវការឆ្លងរីករាលដាល នៃវីរុសកូវីដ-១៩។ រីឯអាជ្ញាធរនៅតាមបណ្ដារដ្ឋនីមួយៗ បានរឹតបន្ដឹងដល់ប្រជាពលរដ្ឋក្នុងការធ្វើដំណើរទៅមកនៅទូទាំងប្រទេស។

បើតាមអង្គការ KPMG បានចេញរបាយការណ៍របស់ខ្លួន កាលពីពេលកន្លងទៅនេះថា ការចំណាយ ថវិការៀបចំពិធីអាពាហ៍ពិពាហ៍របស់ជនជាតិឥណ្ឌាក្នុងមួយឆ្នាំអស់ប្រហែល ជាង ៥០ ពាន់លានដុល្លារអាមេរិក។ ប៉ុន្ដែកាលពីប៉ុន្មានសប្ដាហ៍កន្លងមកនេះ វីរុសកូវីដ-១៩ បានរាលដាលយ៉ាងឆាប់រហ័សនៅក្នុងប្រទេស ដែលមានពលរដ្ឋ ជាង ១,៣ ពាន់នាក់នេះ រហូតរដ្ឋាភិបាលឥណ្ឌាប្រកាសបិទប្រទេសទាំងមូល។

ស្របពេលរដ្ឋាភិបាលដាក់បម្រាមគោចរនោះ ក៏មានយុវជន ឈ្មោះ Kumar ធ្វើជាកម្មករម្នាក់បាន រៀបអាពាហ៍​​ពិពាហ៍ជាមួយនឹងប៉ូលិសស្រីម្នាក់ ឈ្មោះ Soni Kumari មានវ័យ២៥ឆ្នាំ។ កូនកំលោះក្រមុំទាំង២នាក់នេះ ជាកូនរបស់កសិកររស់នៅភាគខាងកើតរដ្ឋប៊ីហារ (Bihar) ហើយពួកគេទាំង២ នាក់បានចំណាយលុយប្រហែល២សែនរូពី (លុយឥណ្ឌា) ឬស្មើនឹងជាង២៦១៨ដុល្លារអាមេរិក។

កូនកំលោះរបស់ Soni Kumari បាននិយាយថា លុយជាង២៦០០ដុល្លារនេះ គឺជាលុយរួមគ្នា រវាងគ្រួសារគាត់ និងគ្រួសារគូដណ្ដឹង។ លុយទាំងនេះ គឺច្រើនណាស់ សម្រាប់គ្រួសាររបស់ពួកគេ។ បើតាមទំនៀមទម្លាប់នៅក្នុងការរៀបអាពាហ៍ពិពាហ៍របស់អ្នករស់នៅក្នុងរដ្ឋនេះ នឹងមានមនុស្សជាច្រើនពាន់នាក់មកចូលរួម។ ប៉ុន្ដែការរៀបការរបស់ពួកគេបានកើតឡើងចំពេលស្ថានការណ៍បែបនេះ ទើបពួកគេកាត់បន្ថយភ្ញៀវអស់ហើយ ហើយក៏មិនមានអ្នកមកចូលរួមដែរ។

ជាមួយគ្នានេះដែរ អ្នកវិភាគផ្នែកហិរញ្ញវត្ថុ វ័យ២៨ឆ្នាំ លោក Mahesh Pakala រស់នៅរដ្ឋ Karnataka បានថ្លែងថា​ បើតាមកម្មវិធីអាពាហ៍ពិពាហ៍របស់លោក អាចនឹងមានបងប្អូនមកចូលរួមច្រើន ដោយមានសាច់ញាតិ នៅ​តាមបណ្ដារដ្ឋជាច្រើន ត្រូវធ្វើដំណើរតាមរថភ្លើង។ ប៉ុន្ដែនៅពេលនេះ អាជ្ញាធរបានរឹតបន្ដឹងការធ្វើដំណើររបស់ពលរដ្ឋ ដូច្នេះពិតជាមិនមានអ្នកណាមកចូលរួមក្នុងពិធីមង្គលការរបស់គាត់ឡើយ។

ស្របពេលនោះដែរ ក៏មានកូនកំលោះក្រមុំ២គូទៀតរៀបការ ក្នុងស្ថានការណ៍បែបនេះ ក៏មានបញ្ហាប្រហាក់ប្រហែលខាងលើនេះដែរ៕