អស្ចារ្យណាស់! ក្រុមអ្នកស្រាវជ្រាវបានប្រើប្រាស់រូបភាពផ្កាយរណប អមជាមួយបញ្ញាសិប្បនិម្មិត ដើម្បីស្វែងរករណ្ដៅគ្រាប់មីន នៅក្នុងប្រទេសកម្ពុជា

អាមេរិក៖ ក្រុមអ្នកស្រាវជ្រាវកំពុងប្រើប្រាស់បញ្ញាសិប្បនិម្មិត AI ដើម្បីស្រាវជ្រាវនិងស្វែងរកគ្រាប់មិនទាន់ផ្ទុះ ដែលត្រូវបានទម្លាក់នៅក្នុងប្រទេសកម្ពុជា អំឡុងសង្គ្រាមវៀតណាម ដោយប្រើប្រាស់រូបភាពចេញពីផ្កាយរណប។ ប្រព័ន្ធថ្មីនេះប្រើក្បួនដោះស្រាយនិងអាចកំណត់ចំណាំវត្ថុ ដែលអាចស្វែងរករណ្ដៅគ្រាប់ រួមមានរូបរាង ពណ៌ វាយភាព និងទំហំរបស់វា។ បន្ទាប់មក ក្បួនដោះស្រាយទាំងនេះនឹងស្កេនរូបភាព តាមរយៈផ្កាយរណប ដើម្បីស្វែងរករណ្ដៅគ្រាប់នានា។

ក្រុមអ្នកស្រាវជ្រាវមកពីសាកលវិទ្យាល័យរដ្ឋ Ohio បានប្រើប្រាស់ប្រព័ន្ធនេះ ដើម្បីស្វែងរករណ្ដៅមួយចំនួន នៅក្នុងខេត្ដព្រៃវែង ដែលជាតំបន់ដែលត្រូវបានគេទម្លាក់គ្រាប់បែកយ៉ាងខ្លាំង នៅចម្ងាយប្រហែល ៣០ គីឡូម៉ែត្រពីព្រំដែនប្រទេសវៀតណាម។ គំរូនេះអាចស្វែងរករណ្ដៅគ្រាប់បែក ច្រើនជាង ១៦០ ភាគរយដោយពឹងផ្អែកលើវិធីសាស្ដ្រកំណត់ចំណាំវត្ថុស្ដង់ដារ នេះបើយោងតាមការសិក្សា ដែលចេញផ្សាយនៅក្នុងទិនានុប្បវត្តិ PLOS ONE។

ក្រុមអ្នកស្រាវជ្រាវបានបញ្ចូលគ្នា នូវគំរូជាមួយនឹងកំណត់ត្រាយោធានៃគ្រាប់បែកដែលបានទម្លាក់ នៅក្នុងតំបន់ និងរបាយការណ៍ពីក្រុមដោះមីន ស្ដីពីគ្រាប់មិនទាន់ផ្ទុះនៅក្នុងដី។ ប្រការនេះនាំឲ្យពួកគេអាចប៉ាន់ស្មានថា គ្រាប់បែកអាចធ្លាក់រាយប៉ាយនៅជុំវិញភូមិ ចំនួន ៤៤ ភាគរយទៅ ៥០ ភាគរយនៅមិនទាន់ផ្ទុះ។​

គ្រាប់មីនសកម្មរាប់លានគ្រាប់នៅតែពង្រាយ នៅក្នុងប្រទេសអាស៊ីអាគ្នេយ៍។ ក្រុមប្រឹក្សាអំពីគ្រាប់មីន (MAG) បានប៉ាន់ស្មានថា ប្រជាជនកម្ពុជាជាង ៦៤,០០០ នាក់ត្រូវបានសម្លាប់ឬរងរបួស ដោយសារគ្រឿងផ្ទុះ ចាប់តាំងពីឆ្នាំ ១៩៧៩។

លោក Erin Lin ជំនួយការសាស្ត្រាចារ្យនៅសាកលវិទ្យាល័យរដ្ឋ Ohio បាននិយាយថា៖ «ដំណើរការដោះមីនមានតម្លៃថ្លៃនិងចំណាយពេលច្រើន ប៉ុន្ដែគំរូរបស់យើងអាចជួយកំណត់តំបន់ដែលងាយរងគ្រោះថ្នាក់បំផុត ដែលគួរតែដោះមីនជាមុន»៕