អ្នកណាគេអ៊ីចេះ! Conte និងតា Sarri កំពុងតាមប្រមាញ់យកកីឡាករឆ្នើមម្នាក់របស់ Chelsea

អ៊ីតាលី៖ ក្លិប Juventus និង Inter Milan ត្រូវបានគេរាយការណ៍ថា មានចំណាប់អារម្មណ៍ក្នុងការចុះកុងត្រាយកខ្សែការពារស្លាបឆ្វេងរបស់ក្រុមតោខៀវ Chelsea កីឡាករ Emerson Palmieri។

ក្នុងរដូវកាលនេះ ស្ថិតក្រោមការដឹកនាំរបស់លោក Frank Lampard កីឡាករសញ្ជាតិអ៊ីតាលី មានឱកាសបានចូលលេងចំនួន១៨ប្រកួត ក្នុងនោះគេបញ្ជូនគ្រាប់បាល់រួមក្រុមសម្រេចទីបាន១ដង។

យោងតាមការចុះផ្សាយរបស់កាសែត Tuttosport ក្លិបយក្សអ៊ីតាលី Juventus និង Inter បានត្រៀមសំណើ ៣០លានអឺរ៉ូ (ឬប្រមាណ ៣២លានដុល្លារ) ដេញថ្លៃយក Emerson ពី Chelsea។ ប្រភពដដែលបានបន្ថែមទៀតថា សម្រាប់កីឡាករផ្ទាល់ក៏មិនសប្បាយជាចិត្តចំពោះរបៀបដែលលោក Lampard ដឹកនាំផងដែរ។

ខ្សែការពារវ័យ២៥ឆ្នាំ បានចាកចេញពីក្រុម Roma មករួមរស់នៅកីឡដ្ឋាន Stamford Bridge កាលពីឆ្នាំ២០១៨ ក្នុតម្លៃផ្ទេរ២០លានអឺរ៉ូ។ គិតមកទល់ពេលនេះ គេបង្ហាញខ្លួនសរុបឲ្យក្រុមតោខៀវបាន ៥២ប្រកួត។ ជាមួយគ្នានេះ ក្នុងនាមជាខ្សែការពារគេ រកបាន១គ្រាប់ និងបញ្ជូនបាល់ឲ្យមិត្ករួមក្រុមបញ្ចប់ទីបាន៥ដង។

តំណែងខ្សែការពារស្លាបស្ដាំ ជម្រើសតំបូងក្នុងក្រុម Chelsea ត្រូវបានលោក Lampard ផ្ដល់ការទុកចិត្តទៅលើកីឡាករ​វ័យក្មេង Reece James ហេតុនេះហើយទើប Emerson ហាក់មិនសូវសប្បាយចិត្តនឹងការរៀបចំរបស់គ្រូបង្វឹកសញ្ជាតិអង់គ្លេស នឹងមានបំណងចង់ចាកចេញ។

យ៉ាងណាមិញ Emerson ត្រូវបានគេមើលឃើញថា ការផ្លាស់ទៅចូលរួមជាមួយ Inter អាចនឹងល្អជាងការផ្ទេរទៅលេងនៅ Juventus ពីព្រោះគេអាចនឹងទទួលបានឱកាសបង្ហាញខ្លួនច្រើន ក្រោមការដឹកនាំរបស់លោក Conte ៕

ប្រភព៖ caughtoffside