រដ្ឋាភិបាលឥណ្ឌាបានសម្រេចបិទទ្វារប្រទេសទាំងស្រុងចំនួន២១ថ្ងៃតាំងពីកណ្តាលយប់ថ្ងៃអង្គារ (២៤ មីនា) ក្នុងន័យទប់ស្កាត់ការរាតត្បាតកូវីដ១៩។ បន្តមក រំលងមួយថ្ងៃសោះប្រទេសនេះបានធ្វើតេស្តរកឃើញអ្នកឆ្លងសរុប ៥០០ ករណី និងយ៉ាងហោចណាស់១០ករណីបាត់បង់ជីវិតគិតត្រឹមព្រឹកថ្ងៃ ២៥ មីនា ២០២០។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សបើទោះពលរដ្ឋឥណ្ឌាមួយចំនួនបានសាទរចំពោះវិធានការរបស់រដ្ឋក៏ពិតមែន តែមានពលរដ្ឋផ្សេងទៀតដែលមានជីវភាពមិនអំណោយផលបានអះអាងថាខ្លួនពិតជាខ្លាចស្លាប់ដោយសារអត់បាយមុនស្លាប់ដោយសារឆ្លងកូវីដ១៩ទៅទៀត។
សារព័ត៌មានអន្តរជាតិ BBC បានចុះស្រង់សំដីបុរសដែលមានរាងកាយទ្រុឌទ្រោមម្នាក់ឈ្មោះថា Ramesh Kumar ជាកម្មករសំណង់ មកពីស្រុក Banda ក្នុងក្រុង Uttar Pradesh ប្រទេសឥណ្ឌា។
បុរសចំណាស់រូបនេះ បានរៀបរាប់ប្រាប់ថា ពេលនេះគាត់ពិតជាខ្លាចដាច់ពោះស្លាប់ព្រោះគ្មានអាហារហូបជាងខ្លាចឆ្លងវីរុសកូរ៉ូណាទៅទៀត។
គាត់បន្តថា៖ «គ្រប់គ្នាត្រូវអាជ្ញាធរតម្រូវឲ្យនៅក្នុងផ្ទះ មិនឲ្យចេញក្រៅដើម្បីកុំឲ្យឆ្លងជំងឺ ប៉ុន្តែខ្ញុំរកលុយបានមួយថ្ងៃ សម្រាប់តែមួយថ្ងៃទេ ពោលគឺបានតែ ៦០០ rupees ស្មើនឹង ៨ដុល្លារក្នុងមួយថ្ងៃប៉ុណ្ណោះ។ ខ្ញុំមានសមាជិកគ្រួសារដល់ទៅ៥នាក់។ ពេលនេះយើងជិតអស់ម្ហូបអាហារសាគួរហើយ។ ខ្ញុំដឹងថាកូវីដ១៩នោះ វាគួរឲ្យខ្លាចណាស់ ប៉ុន្តែខ្ញុំមិនអាចទ្រាំមើលកូនខ្លួនឯងនៅផ្ទះដោយក្តីស្រេកឃ្លាននោះទេ។»
លោក Ramesh Kumar បាននិយាយបន្តទាំងក្រៀមក្រំថា៖ «ពួកយើងដឹងថាគ្មានអ្នកណានឹងមកជួលយើងឲ្យធ្វើការទេ ព្រោះប្រទេសជាតិកំពុងស្ថិតក្នុងស្ថានភាពអាក្រក់ តែពួកយើងគ្មានជម្រើសទេ ទើបចេញមកក្រៅផ្ទះ ព្រោះសង្ឃឹមថាបានចំណូល បើទោះអាជ្ញាធរហាមក៏ដោយ។ តើឲ្យយើងជ្រើសមួយណារវាងសុវត្ថិភាព និងដុំបាយ?»
ជាការកត់សម្គាល់ BBC បានបញ្ជាក់ក្នុងទិន្នន័យរបស់ខ្លួនថា មានពលរដ្ឋឥណ្ឌារាប់លាននាក់ទៀត កំពុងជួបប្រទះនូវស្ថានភាពអត់ឃ្លាន។
បើទោះជាបែបនេះក្តី តាមព័ត៌មានផ្លូវការបានអះអាងថា រដ្ឋាភិបាលឥណ្ឌាបានសន្យានឹងពលរដ្ឋថាខ្លួននឹងចេញមុខជួយសម្រួលជីវភាពដល់ពលរដ្ឋទីទ័លក្រដែលរកចំណូលមួយថ្ងៃដើម្បីមួយថ្ងៃ។ ប៉ុន្តែព័ត៌មានខាងលើក៏បន្ថែមថា វាមានភាពស្មុគស្មាញច្រើនដែរ។
ក្រៅពីនោះអង្គការការងារអន្តរជាតិថា យ៉ាងហោចណាស់មាន៩០ភាគរយនៃពលរដ្ឋឥណ្ឌា ដែលធ្វើការដូចជា ការងារជាអ្នកប្រមូលសំរាម ជាសន្តិសុខ អ្នកអនាម័យ អ្នកលក់ដូរតាមចិញ្ចើមផ្លូវជាដើម។
គួររំឭកថា បន្ទាប់ពីមានករណីឆ្លងចំនួន៤៦៩នាក់ និងស្លាប់១០នាក់ដោយសារកូវីដ១៩ រដ្ឋាភិបាលឥណ្ឌា លោក Narendra Modi កាលពីថ្ងៃអង្គារ ទី២៤មីនានេះ បានប្រកាសឲ្យបិទប្រទេសរយៈពេល២១ថ្ងៃជាបណ្តោះអាសន្នដើម្បីទប់ស្កាត់ការរាលដាលកូវីដ១៩ ដោយរាប់ចាប់ពីពាក់កណ្តាលយប់ថ្ងៃ២៤មីនាតទៅ៕