ថៃ៖ អ្នកនាំពាក្យក្រសួងសុខាភិបាលថៃ បាននិយាយនៅក្នុងសន្និសីទកាសែតមួយនៅថ្ងៃចន្ទនេះថា ប្រទេសថៃបានរកឃើញអ្នកឆ្លងវីរុសកូវីដ-១៩ ចំនួន១២២នាក់បន្ថែមទៀត ដែលធ្វើឲ្យតួលេខអ្នកឆ្លងសរុបកើនដល់៧២១នាក់។ នេះបើយោងតាមសារព័ត៌មានអន្ដរជាតិ Reuters បានចេញផ្សាយនៅថ្ងៃចន្ទ ទី២៣ ខែមីនា ឆ្នាំ២០២០។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សអ្នកនាំពាក្យខាងលើបានបញ្ជាក់ថា ក្នុងចំណោមអ្នកឆ្លងថ្មីទាំង១២២នាក់នេះ មានចំនួន២០នាក់ជាអ្នកជំងឺដែលជាប់ទាក់ទងនឹងករណីមុនៗ (ករណីនៅកន្លែងប្រកួតប្រដាល់ កន្លែងកម្សាន្ត និងករណីអ្នកចូលរួមពិធីបុណ្យសាសនានៅប្រទេសម៉ាឡេស៊ី) ហើយ១០នាក់ជាករណីថ្មីដែលធ្វើដំណើរមកពីបរទេស រួមនឹង៩២នាក់ផ្សេងទៀតត្រូវបានធ្វើតេស្ដវិជ្ជមាន ហើយបច្ចុប្បន្នមនុស្សទាំង៩២នាក់នេះ កំពុងស្ថិតក្រោមការស៊ើបអង្កេតបន្ថែម ដើម្បីរកមូលហេតុនៃការឆ្លង។
គួរឲ្យដឹងដែរថា ប្រទេសថៃមានមនុស្សស្លាប់ដោយសារវីរុសកូវីដ-១៩ ចំនួនមួយនាក់ ចាប់តាំងពីការផ្ទុះរាលដាលដំបូងក្នុងប្រទេស ហើយមកទល់នឹងពេលនេះ អ្នកជំងឺចំនួន៦៦៨នាក់ កំពុងសម្រាកព្យាបាលនៅក្នុងមន្ទីរពេទ្យ ខណៈមនុស្ស៥២នាក់បានជាសះស្បើយហើយបានត្រលប់ទៅផ្ទះរបស់ពួកគេវិញ។
សូមជម្រាបថា ប្រទេសថៃជាប្រទេសដែលមានចំនួនអ្នកឆ្លងវីរុសកូវីដ-១៩ ច្រើនលំដាប់ទីពីរនៅក្នុងតំបន់អាស៊ីអាគ្នេយ៍ បន្ទាប់ពីប្រទេសម៉ាឡេស៊ី ដែលជាប្រទេសរងគ្រោះខ្លាំង ខណៈអ្នកឆ្លងវីរុសបានកើនដល់១,៣០៦នាក់ នេះបើយោងតាមទិន្នន័យផ្លូវការដែលប្រកាសដោយអាជ្ញាធររបស់់ក្រសួងសុខាភិបាលជាតិ៕