ថៃ៖ មន្ដ្រីក្រសួងសុខាភិបាលជាន់ខ្ពស់បាននិយាយថា ប្រទេសថៃបានរាយការណ៍ពីករណីឆ្លងវីរុសកូរ៉ូណាប្រភេទថ្មី ចំនួន ១៨៨ នាក់ នៅថ្ងៃអាទិត្យនេះ ដែលជាការកើនឡើងប្រចាំថ្ងៃដ៏ធំបំផុតរបស់ខ្លួន ហើយករណីឆ្លងសរុបបានកើនឡើងដល់ចំនួន ៥៩៩ នាក់។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សអ្នកនាំពាក្យក្រសួង លោក Taweesin Wisanuyothin បានប្រាប់សន្និសីទកាសែតថា ភាគច្រើនករណីឆ្លងថ្មីមានការពាក់ព័ន្ធនឹងករណីឆ្លងមុនៗ នៅឯកីឡដ្ឋានប្រដាល់លុម្ពិនី។ លោកបានបន្ថែមថា មនុស្សចំនួន ៧ នាក់ស្ថិតនៅក្នុងស្ថានភាពធ្ងន់ធ្ងរ ខណៈដែលមនុស្សម្នាក់បានជាសះស្បើយរួចហើយ។
លោកដុកទ័រ Taweesin បាននិយាយថា៖ «ករណីថ្មីៗភាគច្រើន ត្រូវបានរកឃើញនៅក្នុងទីក្រុងបាងកក និងស្ថិតនៅក្នុងចំណោមយុវជនដែលបន្ដសកម្មភាពសង្គម ដែលអាចនាំឲ្យមានការឆ្លងកាន់តែច្រើន»។
ការឆ្លងនៅក្នុងប្រទេសថៃ បានលោតឡើងខ្លាំងនៅខែនេះ ដែលជំរុញឲ្យរដ្ឋាភិបាលបិទផ្សារទំនើប ភោជនីយដ្ឋាន និងកន្លែងប្រមូលផ្ដុំផ្សេងទៀត ដើម្បីបញ្ឈប់ការរាតត្បាត។ រាជធានីរបស់ប្រទេសនេះ បានបិទការចេញចូលនៅផ្នែកខ្លះ ចាប់ពីថ្ងៃអាទិត្យនេះ។ រហូតមកដល់ពេលនេះ មានមនុស្សស្លាប់ដោយសារជំងឺកូវីដ-១៩ ក្នុងប្រទេសថៃ ចំនួនមួយករណី៕