អុីតាលី៖ កាលពីថ្ងៃសុក្រម្សិលមិញនេះ ប្រទេសអុីតាលីបានរាយការណ៍មកថា មនុស្សយ៉ាងហោចណាស់ ៦២៧ នាក់បានស្លាប់ដោយសារជំងឺរលាកផ្លូវដង្ហើមកូវីដ-១៩ ដោយគិតត្រឹមរយៈពេលមួយថ្ងៃប៉ុណ្ណោះ ហើយអត្រាមរណនេះ ជាតួលេខកើនខ្ពស់បំផុត ចាប់តាំងពីការផ្ទុះឡើងក្នុងប្រទេសជាងបួនសប្ដាហ៍កន្លងមក។ នេះបើយោងតាមការចេញផ្សាយរបស់សារព័ត៌មានអន្ដរជាតិ The Independent ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សបច្ចុប្បន្ន អុីតាលីបានក្លាយជាប្រទេសដែលមានចំនួនមនុស្សស្លាប់ដោយសារជំងឺកូវីដ-១៩ ច្រើនជាងគេបំផុតក្នុងពិភពលោក។ ហើយមកទល់នឹងពេលនេះ ជំងឺដែលកំពុងរាតត្បាតជាសកលនេះ បានឆក់យកអាយុជីវិតប្រជាជនក្នុងប្រទេសអុីតាលីសរុប ៤,០៣២ នាក់ ខណៈករណីឆ្លងកើនដល់ ៤៧,០២១ នាក់។ ហើយក្នុងចំណោមតួលេខទាំងនេះ គេសង្កេតឃើញថា តំបន់ Lombardy ស្ថិតនៅភាគខាងជើងប្រទេសអុីតាលី គឺជាចំណុចផ្ទុះខ្លាំងជាងគេ ដែលបច្ចុប្បន្នកំពុងស្ថិតក្នុងស្ថានភាពធ្ងន់ធ្ងរនៅឡើយ ដោយមនុស្សចំនួន ២,៥៤៩ នាក់បានស្លាប់ និងអ្នកឆ្លងមានចំនួន ២២,២៦៤ នាក់។
គួរជម្រាបផងដែរថា ខណៈពេលដែលជំងឺកូវីដ-១៩ កាន់តែរាតត្បាតខ្លាំងឡើងៗ អាជ្ញាធររបស់ប្រទេសអុីតាលីក៏បានចាត់វិធានការណ៍យ៉ាងតឹងរឹងដោយហាមឃាត់មិនឱ្យមានការជួបជុំនៅតាមទីសាធារណៈ ចំណែកសាលារៀន កន្លែងហាត់ប្រាណ ហាង រោងកុន និងទីកន្លែងកម្សាន្តផ្សេងៗត្រូវបានបិទចោល។ លើសពីនេះទៀត អាជ្ញាធរក៏បានហាមឃាត់មិនឱ្យមានរៀបចំពិធីមង្គលការ និងពិធីបុណ្យសពផងដែរ៕