ក្រសួងការបរទេស និងសហប្រតិបត្តិការអន្តរជាតិកម្ពុជា នៅថ្ងៃព្រឹកទី១៩ ខែមីនា ឆ្នាំ២០២០នេះ បានចេញលិខិតមួយ(ចុះថ្ងៃ១៨ មីនា) ដោយផ្ញើជូនស្ថានទូតវៀតណាមប្រចាំកម្ពុជា។ ក្នុងលិខិតនោះបានបញ្ជាក់អំពីការបិទច្រកព្រំដែនមួយរយៈ ដោយមិនអនុញ្ញាតឱ្យប្រជាជនវៀតណាមឆ្លងកាត់មកកម្ពុជាតាមគ្រប់ផ្លូវគោក ផ្លូវទឹក និងផ្លូវអាកាសឡើយ ពោលគឺចាប់ពីថ្ងៃ១៨ មីនាតទៅ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សក្រៅពីនោះក្នុងលិខិតដដែលក៏បានបន្ថែមថា ចំពោះពលរដ្ឋកម្ពុជាវិញក៏មិនត្រូវបានអនុញ្ញាត្តិឲ្យធ្វើដំណើរទៅវៀតណាមគ្រប់ច្រកទាំងអស់ជាបណ្តោះអាសន្នដូចគ្នា។ ក្នុងករណីនេះក្រសួងការបរទេសបញ្ជាក់ថា ទាំងពលរដ្ឋកម្ពុជា និងពលរដ្ឋវៀតណាមនឹងត្រូវផ្អាកមួយរយៈនូវការចេញចូលទៅវិញទៅមកចាប់ពីថ្ងៃ២០ មីនាតទៅ។
វិធានការនេះត្រូវបានធ្វើឡើងដោយអាជ្ញាធរអះអាងថា ដើម្បីចៀសវាងការលំបាកកើតឡើងនៅច្រកព្រំដែនរួមរវាងប្រទេសទាំងពីរ ក្រោយករណីមានការកើនឡើងយ៉ាងគំហុកនូវការរកឃើញវីរុសកូវីដ១៩ ជាបន្តបន្ទាប់។
យ៉ាងណាក្រសួងបញ្ជាក់ថា វិធានការទាំងនេះ មិនត្រូវបានអនុវត្តចំពោះពលរដ្ឋវៀតណាម និងពលរដ្ឋខ្មែរ ដែលកាន់លិខិតឆ្លងដែនការទូត និងផ្លូវការទេ។ ហើយកម្ពុជាក៏បានស្នើឲ្យវៀតណាមជួយសម្រួលការធ្វើមាតុភូមិនិវត្តន៍របស់ពលរដ្ឋកម្ពុជាមកស្រុកវិញ បើពួកគេចង់ផងដែរ។
គួរបញ្ជាក់ថា គិតត្រឹមថ្ងៃទី១៨ ខែមីនានេះ កម្ពុជាបានប្រកាសរកឃើញអ្នកឆ្លង COVID-19 ៤ករណីបន្ថែមទៀត ធ្វើឲ្យតួលេខឆ្លងសរុបនៅកម្ពុជាកើនឡើងដល់៣៧ករណី។ ករណីឆ្លងទាំង៤ករណីនេះ គឺជាបុរសជនជាតិខ្មែរដែលត្រលប់ពីពិធីបុណ្យសាសនានៅម៉ាឡេស៊ី និង២ករណី ជាបុរសជនជាតិម៉ាឡេស៊ី។ ករណីឆ្លងទាំង២ករណីនេះ គឺជាបុរសខ្មែរ ដែលមកពីបុណ្យសាសនានៅម៉ាឡេស៊ី។
តាមពិតទៅ២ករណីនៅខេត្តកំពត ដែលមានអ្នកឆ្លងជាជនជាតិម៉ាឡេស៊ី គឺជាករណីដែលលោកស្រី ឱ វណ្ណឌីន អ្នកនាំពាក្យក្រសួងសុខាភិបាល បានប្រកាសផ្ទាល់មាត់នាសន្និសីទសារព័ត៌មាននៅទីស្តីការគណៈរដ្ឋមន្ត្រី ដោយលោកស្រីថា ជាករណីនៅខេត្តកែប បន្ថែមលើករណីបុរសម៉ាឡេស៊ី៣នាក់។ ប៉ុន្តែរបាយការណ៍នៅពេលយប់បញ្ជាក់ ថា អ្នកជំងឺទាំងពីររូបដែលមានអាយុ៦០ឆ្នាំ និង៦៤ឆ្នាំ ស្ថិតក្នុងក្រុងកំពត ដែលពេលនេះកំពុងដាក់នៅដាច់ដោយឡែកនៅមន្ទីរពេទ្យខេត្តកំពត។
រីឯករណីថ្មីស្ថិតនៅខេត្តត្បូងឃ្មុំ ដែលជាបុរសខ្មែរ អាយុ៧១ឆ្នាំ ឃុំទ្រា ស្រុកក្រូចឆ្មារ និងអាយុ៥២ឆ្នាំ នៅឃុំដារ ស្រុកមេមត់។ ពួកគាត់ត្រូវបានដាក់ព្យាបាលដាច់ដោយឡែកនៅពេទ្យខេត្តត្បូងឃ្មុំ។ បុរសទាំងពីរស្ថិតក្នុងចំណោមមនុស្ស៧៩នាក់ដែលបានវិលត្រឡប់ពីពិធីបុណ្យសាសនានៅម៉ាឡេស៊ី។
ហើយគិតមកដល់ពេលនេះ កម្ពុជាមានអ្នកឆ្លង COVID-19 ចំនួន៣៧ករណីហើយ ដែលក្នុងនោះមានស្រី២នាក់។ អ្នកដែលឆ្លងមាន ចិន១នាក់នៅខេត្តព្រះសីហនុដែលបានជាសះស្បើយ ក្រៅពីនេះមាន អង់គ្លេស៣នាក់ កាណាដា១នាក់ បែលហ្ស៊ិក១នាក់ បារាំង២នាក់ (ក្នុងនោះមានទារកអាយុ៤ខែ) ម៉ាឡេស៊ី៥នាក់ និងខ្មែរ២៤នាក់ ដោយ២១នាក់ស្ថិតក្នុងចំណោមអ្នកមកពីពិធីបុណ្យសាសនានៅម៉ាឡេស៊ី។
សូមអានសេចក្តីជូនព័ត៌មានខាងក្រោមនេះ ៖