អាមេរិក៖ ក្រុមអ្នកស្រាវជ្រាវបានរកឃើញផូស៊ីលរបស់ត្រីមួយ ដែលមានម្រាមដៃ នៅផ្នែកខាងចុងព្រុយរបស់វា ហើយធ្លាប់បានរស់នៅ ៣៨០ លានឆ្នាំមុន នេះបើយោងតាមការស្រាវជ្រាវថ្មី។ ពួកគាត់ជឿថា វាបានផ្សារភ្ជាប់គម្លាតវិវត្ដ រវាងសត្វមានឆ្អឹងខ្នងក្នុងសមុទ្រនិងលើដី ហើយវាជាឧទាហរណ៍មួយ ក្នុងចំណោមគំរូចាស់បំផុត នៃលំនាំគ្រោងឆ្អឹងដែលស្រដៀងនឹងដៃ។

រូបគំនូរតំណាងសត្វមានជើងបួនរាងដូចត្រី

ប្រហែលជា ៣៧៤ លានឆ្នាំមុន ជីវិតនៅលើផែនដីចាប់ផ្ដើមផ្លាស់ប្ដូរចេញពីមហាសមុទ្រ ដើម្បីដើរលើដី។ កត្ដានេះបានវិវត្ដក្លាយទៅជាសត្វមានឆ្អឹងខ្នង ដែលមានជើងបួន រួមបញ្ចូលទាំងដាយណូស័រ សត្វដើរលើដី និងទីបំផុតមនុស្ស។ អ្នកវិទ្យាសាស្ដ្រចាត់ទុកថា នេះជាការវិវត្ដចេញទឹកទៅលើដី ហើយសត្វដែលទទួលបានដៃនិងជើងគឺជាព្រឹត្ដិការណ៍ដ៏សំខាន់បំផុតមួយ នៅក្នុងប្រវត្ដិនៃជីវិតនៅលើផែនដី។ ប៉ុន្ដែកំណត់ត្រាផូស៊ីលអំពីជំហាននៃការវិវត្ដ រវាងជីវិតសត្វសមុទ្រនិងជីវិតសត្វនៅលើគោក គឺនៅរាយប៉ាយ។

ការវិវត្ដនៃជីវិតសត្វ ចេញពីមហាសមុទ្រទៅលើគោក

ក្រុមអ្នកស្រាវជ្រាវបានផ្ដោតលើការខិតខំប្រឹងប្រែងរបស់ពួកគេ ទៅលើសត្វមានជើងបួនរាងដូចត្រី​ ដែលត្រូវបានគេហៅថា elpistostegalians ដែលធ្លាប់រស់នៅចន្លោះ ៣៥៨ ទៅ ៣៩៣ លានឆ្នាំមុន។ រហូតមកដល់ពេលនេះ ក្រុមអ្នកវិទ្យាសាស្ដ្រមិនដែលបានរកឃើញគ្រោងឆ្អឹងពេញលេញ ប៉ុន្ដែទើបតែរកឃើញផូស៊ីពេញលេញមួយរបស់ elpistostegalian ដែលជាផូស៊ីលមានប្រវែង ១៥២ សង់ទីម៉ែត្រ។

ការស្កេនគ្រោងឆ្អឹងបានបង្ហាញថា យ៉ាងហោចណាស់មានឆ្អឹងម្រាមចំនួនពីរ ដែលមានរាងដូចម្រាមដៃ។ ពួកគេបានរកឃើញដៃ​ កែងដៃ កំភួនដៃ និងកដៃដែលនៅជាប់នឹងខ្ទង់ម្រាមដៃ។ ការស្រាវជ្រាវមួយនេះត្រូវបានចេញផ្សាយនៅលើទនិ្ននុប្បវត្តិមានឈ្មោះថា Nature៕

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក បច្ចេកវិទ្យា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]

ចង់ក្លាយជាអ្នកសរសេរក្រៅម៉ោងមានប្រាក់ចំណូលសូមចុះឈ្មោះទីនេះ