អុីតាលីប្រើយន្ដហោះចម្បាំងបាញ់ផ្សែងដែលមានពណ៌ដូចទង់ជាតិ និងចាក់ចម្រៀង ដើម្បីលើកទឹកចិត្តប្រជាជន ខណៈ Covid-19 កំពុងរាតត្បាត (មានវីដេអូ)

អុីតាលី៖ កងទ័ពអាកាសអុីតាលី បានប្រើប្រាស់យន្ដហោះចម្បាំងមួយឈុត ដើម្បីបាញ់ផ្សែងពណ៌មានរាងដូចទង់ជាតិរបស់ប្រទេសអុីតាលី រួមនឹងការចាក់ចម្រៀងមួយបទដែលមានចំណងជើងថា «Nessun Dorma» ដើម្បីលើកទឹកចិត្ដប្រជាជនរបស់ខ្លួន ដែលកំពុងជាប់គាំងនៅតាមផ្ទះ។ ព្រឹត្ដិការណ៍ដ៏អស្ចារ្យនេះ បានធ្វើឲ្យពលរដ្ឋអុីតាលីជាច្រើនបានចូលរួមអបអរសាទរពីបង្អួចផ្ទះ យ៉រផ្ទះ ដោយការគ្រវីបដា ហើយអ្នកមួយចំនួនទៀតបានច្រៀងបន្ទរជាមួយនឹងការគោះចាន ឬ ផើងផ្កាជាដើម។

ជុំវិញព្រឹត្ដិការណ៍មួយនេះដែរ កងទ័ពអាកាសបានថត និងចែករំលែកឃ្លីបវីដេអូនោះទៅលើបណ្ដាញសង្គមដោយសរសេរថា៖

រូបភាពនៃព្រឹត្តិការណ៍ដ៏កម្រមួយនេះ បានរីករាលដាលពាសពេញបណ្ដាញសង្គម សូម្បីតែលោក ដូណាល់ ត្រាំ ក៏បានចែករំលែកវីដេអូនេះដោយសរសេរថា «សហរដ្ឋអាមេរិកស្រលាញ់ប្រទេសអុីតាលី»។ ហើយអ្នកប្រើប្រាស់បណ្ដាញសង្គមជាច្រើនផ្សេងទៀត បានកោតសរសើរចំពោះទំនុកច្រៀងនៃបទចម្រៀង ដែលសាកសមនឹងកាលៈទេសៈរបស់ប្រទេសអុីតាលីនាពេលបច្ចុប្បន្ន។

គួរឲ្យដឹងផងដែរថា ចំនួនអ្នកឆ្លងវីរុស Covid-19 សរុបនៅប្រទេសអុីតាលីបានកើនដល់ ២៤,៧៤៧ នាក់ ខណៈអ្នកស្លាប់មានចំនួន ១,៨០៩ នាក់។ នេះបើយោងទៅតាមតារាងទិន្នន័យ Tracking Coronavirus របស់ BNO News គិតត្រឹមព្រឹកនេះ៕