ក្ដៅៗ! ក្រសួងសុខាភិបាល សម្រេចបិទសាលារៀន CIS សាខាកោះពេជ្រ បន្ទាប់ពី រកឃើញអ្នកធ្វើការនៅទីនោះ ផ្ទុក Covid-19

ភ្នំពេញ៖ ដូចដែលប្រិយមិត្ត បានជ្រាបរួចមកហើយថា កាលពីម្សិលមិញនេះ ក្រសួងសុខាភិបាល បានរកឃើញករណីមានអ្នកផ្ទុកជំងឺ Covid-19 ចំនួន២ករណីបន្ថែមទៀត នៅក្នុងរាជធានីភ្នំពេញ ផ្ទាល់តែម្ដង។

ក្នុងនោះដែរ ករណីតេស្ដវិជ្ជមាននេះ បានកើតឡើងលើ បុរសជនជាតិកាណាដាវ័យ ៤៩ឆ្នាំ និងជនជាតិបែលហ្សិក មានអាយុ៣៣ឆ្នាំ ដែលជារួម បុរសពីររូបខាងលើ កំពុងដាក់ព្យាបាល ដាច់ដោយឡែក នៅក្នុងមន្ទីរពេទ្យ​មិត្តភាពខ្មែរ-សូវៀត។

យ៉ាងណាមិញ មកទល់នឹងពេលនេះ ស្រាប់តែ ក្រសួងសុខាភិបាល បានសម្រេចឲ្យ បិទសាលារៀនមួយ មានឈ្មោះថា CIS សាខាកោះពេជ្រ ជាបណ្ដោះអាសន្ន ដោយសារតែ គេរកឃើញថា បុរសជនជាតិកាណាដា ដែលបានឆ្លងCovid-19 នោះជាអ្នកធ្វើការ នៅសាលានោះតែម្ដង។

សូមបញ្ជាក់ផងដែរថា នៅខណៈពេលនេះដែរ ក្រសួងសុខាភិបាល កំពុងដុតដៃដុតជើង ខំប្រឹងយ៉ាងសស្រាក់សស្រាំ ស្រាវជ្រាវរក អ្នកដែលប៉ះផ្ទាល់ និងប្រយោល ជាមួយបុរសជនជាតិកាណាដា និងបែលហ្សិករូបនោះ៕