អាមេរិក៖ លោកប្រធានាធិបតី ដូណាល់ ត្រាំ បាននិយាយនៅក្នុងពិធីថ្លែងសុន្ទរកថាមួយថា សហរដ្ឋអាមេរិកនឹងផ្អាករាល់ការធ្វើដំណើររវាងសហរដ្ឋអាមេរិក និងអឺរ៉ុបដោយមិនរាប់បញ្ចូលចក្រភពអង់គ្លេសក្នុងរយៈពេល ៣០ ថ្ងៃ ខណៈប្រទេសខ្លួនកំពុងព្យាយាមប្រយុទ្ធប្រឆាំងនឹងវីរុសថ្មី Covid-19។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សក្នុងពិធីថ្លែងសុន្ទរកថាមួយនៅឯការិយាល័យ Oval លោក ដូណាល់ ត្រាំ បានស្ដីបន្ទោសទៅសហគមន៍អឺរ៉ុបថា មិនបានចាត់វិធានការឲ្យឆាប់រហ័ស ដើម្បីទប់ស្កាត់ការផ្ទុះឡើងនៃវីរុស Covid-19 ។ ក្នុងនោះដែរ ប្រធានាធិបតីរូបនេះ ថែមទាំងបាននិយាយត្រង់ៗថា វីរុសនេះបានចូលដល់ប្រទេសរបស់ខ្លួន តាមរយៈអ្នកដំណើរមកពីតំបន់អឺរ៉ុប។ លោក បន្ថែមថា សហរដ្ឋអាមេរិកនឹងឃ្លាំមើលស្ថានការណ៍ ដើម្បីកំណត់ថា តើនឹងអាចបើកឲ្យមានការចេញចូលពីប៉ែកអឺរ៉ុប មុនពេលកំណត់ឬយ៉ាងណា។
គួរឲ្យដឹងដែរថា ច្បាប់ថ្មីនេះនឹងចាត់ចូលជាធរមាន ចាប់ពីពាក់កណ្ដាលអធ្រាត្រថ្ងៃស្រុកនេះតទៅ ហើយចំពោះការរឹតបន្ដឹងនេះនឹងត្រូវកែសម្រួលទៅតាមលក្ខខណ្ឌនាៗ។
ទន្ទឹមនឹងនេះដែរ លោក ដូណាល់ ត្រាំ ក៏បានស្នើឲ្យពលរដ្ឋអាមេរិកទាំងអស់កាត់បន្ថយការធ្វើដំណើរឲ្យបានច្រើន តាមដែលអាចធ្វើទៅបាន។ ហើយលោកសន្យាថានឹងផ្ដល់ជំនួយផ្នែកសេដ្ឋកិច្ចដល់អ្នកដែលត្រូវបានគេដាក់ឲ្យនៅដោយឡែក ឬ អ្នកឆ្លងវីរុស ជាពិសេសចំពោះកម្មករតែម្ដង៕