ក្ដៅៗ! ខ្សែប្រយុទ្ធជួរមុខ Juventus កីឡាករ Dybala ឆ្លងជំងឺ Covid-19

បរទេស៖ ខ្សែប្រយុទ្ធជួរមុខរបស់ក្លិប Juventus កីឡាករ Paulo Dybala ត្រូវបានគេរាយការណ៍មកថាបានធ្វើតេស្ដឃើញវិជ្ជមាន មានផ្ទុកវីរុសកូរ៉ូណាប្រភេទថ្មី (COVID-19) ខណៈក្លិបយក្សអ៊ីតាលីបានប្រកាសអំពីការដាក់កីឡាករ និងបុគ្គលិកចំនួន១២១នាក់ឲ្យនៅដាច់ដោយឡែក។

ខ្សែការពាររបស់ Juventus កីឡាករ​ Daniele Rugani បានក្លាយជាកីឡាករទីមួយក្នុងក្របខណ្ឌ Serie A ដែលត្រូវបានធ្វើតេស្ដឃើញមានផ្ទុកវីរុស COVID-19 កាលពីថ្ងៃពុធកន្លងទៅ។ ខណៈកាលពីថ្ងៃអាទិត្យសប្ដាហ៍មុន Rugani ក៏មានឈ្មោះក្នុងបញ្ជីកីឡាកររបស់ក្រុមក្នុងជំនួបដែលយកឈ្នះ Inter Milan ២-០ ផងដែរ។

បើតាមការចុះផ្សាយរបស់កាសែត El Nacional ខ្សែប្រយុទ្ធជម្រើសជាតិអាហ្សង់ទីន Paulo Dybala គឺជាកីឡាករទីពីររបស់ Juventus ហើយដែលបានធ្វើតេស្ដឃើញវិជ្ជមាន មានជំងឺ Covid-19។

ជាមួយគ្នានេះ ចំពោះកំពូលខ្សែប្រយុទ្ធ កីឡាករ Cristiano Ronaldo វិញបច្ចុប្បន្នកំពុងតែនៅដាច់ដោយឡែក នៅក្នុងផ្ទះរបស់គេនៅទីក្រុង Mediera ប្រទេសព័រទុយហ្គាល់។

របាយចុងក្រោយបានឲ្យដឹងថា ប្រទេសអ៊ីតាលីមានអ្នកឆ្លងវីរុស Covid-19 ចំនួន ១៥,១១៣នាក់ ដោយក្នុងនោះមានមនុស្ស ១,០១៦នាក់ បានស្លាប់បាត់បង់ជីវិតដោយសារជំងឺដ៏សាហាវមួយនេះ៕

ប្រភព៖ DailyMail