អូស្ត្រាលី៖ ប្រិយមិត្ដអ្នកអានប្រាកដជាជ្រាបហើយថា ប៉ុន្មានថ្ងៃចុងក្រោយនេះមានសារព័ត៌មានជាច្រើនបានចុះផ្សាយ ពីករណីប្រជាពលរដ្ឋនៅប្រទេសអូស្ត្រាលី បានសម្រុកទៅដណ្ដើមគ្នាទិញក្រដាសអនាម័យ (ក្រដាសប្រើប្រាស់ក្នុងបង្គន់) សឹងអស់ពីផ្សារ រហូតមានការបង្កជាជម្លោះក៏មាន ស្របពេលវីរុស Covid-19 កំពុងតែវាយលុក។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
តួយ៉ាង បើយោងតាមសារព័ត៌មាន Daily Mail បានចុះផ្សាយពីករណីស្រដៀងគ្នានេះនៅថ្ងៃទី ១០ ខែ មីនា ឆ្នាំ ២០២០ ម្សិលមិញថា ប្រជាជនអូស្ត្រាលីរាប់សិបនាក់ បានតម្រង់ជួរនៅខាងមុខហាងមួយឈ្មោះថា Aldi យ៉ាងច្រើនតាន់តាប់ ដើម្បីរង់ចាំចូលទៅទិញទំនិញ ។ ហើយតាមរយៈសកម្មភាពទាំងនេះដែរ ត្រូវបានថតជាប់ដោយកាមេរ៉ាសុវត្ថិភាពក្នុងហាង ដែលបង្ហាញឲ្យឃើញថា អតិថិជនទាំងអស់បានប្រជែងគ្នាសម្រុកចូល នៅពេលបុគ្គលិកហាងចាប់ផ្ដើមបើកទ្វារ ហើយអតិថិជនម្នាក់ៗបានទិញក្រដាសអនាម័យទាំងនោះជាច្រើនដុំ តាមលទ្ធភាពរបស់ពួកគេ។
ជុំវិញ ភាពស្លន់ស្លោរក្នុងការសម្រុកទៅទិញក្រដាសអនាម័យមកស្ដុកទុកបែបនេះ បានធ្វើឲ្យសាធារណជនមួយចំនួន ហាក់មិនពេញចិត្ដនឹងទង្វើបែបនេះឡើយ។ ដោយមានបុរសម្នាក់បាននិយាយថា៖
ការប្រមូលគ្នារាប់សិបនាក់មកទិញបែបនេះ អាចបង្កឲ្យមានការឆ្លងរាលដាលនៃវីរុសទៅវិញទេ។ ហើយ ប្រសិនបើប្រជាជនឈប់ធ្វើបែបនេះ មនុស្សវ័យចំណាស់ក៏អាចនឹងទៅទិញទំនិញទាំងនោះបានដែរ ព្រោះពួកគាត់ចេញក្រៅទៅទិញតែម្ដងប៉ុណ្ណោះក្នុងមួយសប្ដាហ៍។
គួរឲ្យដឹងដែរថា បច្ចុប្បន្ននេះ ក្រដាសអនាម័យបានក្លាយជាតម្រូវការដ៏ចាំបាច់មួយរបស់ប្រជាជននៅទីក្រុងស៊ីដនី ខណៈផ្សារទំនើបជាច្រើនកំពុងមមាញឹកក្នុងការនាំចូលទំនិញសម្រាប់លក់ ហើយនៅរាល់ពេលទំនិញចូលស្តុកម្ដងៗ នឹងត្រូវលក់អស់ទៅវិញត្រឹមរយៈពេលតែ ១ ម៉ោងប៉ុណ្ណោះ៕
មានវីដេអូខាងក្រោម៖
Bong I.T