សណ្ឋាគារនៅជប៉ុន មានគ្រែដាស់ភ្ញៀវឲ្យក្រោក ដោយគ្មានសំឡេងរំខាន

ជប៉ុន៖ សណ្ឋាគារមួយ ឈ្មោះថា Millennials មានទីតាំងស្ថិតនៅ Shibuya ដែលមានគ្រែអាចដាស់ភ្ញៀវឲ្យក្រោកពីដំណេកដោយគ្មានសំឡេងរំខាន និងបើកភ្លើងដោយស្វ័យប្រវត្តិ នៅពេលដល់ម៉ោងត្រូវក្រោក។

សណ្ឋាគារនេះ ត្រូវបានបំពាក់ទៅដោយ SmartPods ដែលធ្វើឲ្យគ្រែកម្រើក ព្រមទាំងមាន iPod Touch និងអេក្រង់ចំនួន៨០អុីញសម្រាប់ឲ្យភ្ញៀវទស្សនាវីដេអូ ឬរូបថតដែលតភ្ជាប់ពីទូរសព្ទដៃ។ ភ្ញៀវដែលចូលមកស្នាក់ អាចប្រើ iPod សម្រាប់កំណត់ម៉ោងរោទិ៍ធ្វើឲ្យគ្រែមានចលនា បញ្ជាអំពូលភ្លើង និងគ្រប់គ្រងសីតុណ្ហភាព។ ហើយគ្រែទាំងនោះ មានទទឹង១២០សង់ទីម៉ែត្រ និងពូកកម្រាស់២៥សង់ទីម៉ែត្រ ដែលខាងសណ្ឋាគារប្រាប់ថា វាមានផាសុកភាពជាងសណ្ឋាគារផ្កាយប្រាំទៅទៀត។ ចំណែកឯនៅពីក្រោមគ្រែវិញ មានទំហំធំល្មមសម្រាប់ដាក់វ៉ាលី។

ចំពោះតម្លៃមានចាប់ពី៤០ដុល្លារឡើងទៅក្នុងមួយយប់ ហើយសណ្ឋាគារក៏មានទីធ្លាធំទូលាយ សម្រាប់ឲ្យភ្ញៀវអង្គុយលំហែកាយ និងធ្វើការផ្ទាល់ខ្លួនផងដែរ។ អ្វីដែលពិសេសនោះគឺអាហារពេលព្រឹកត្រូវបានរាប់បញ្ចូលក្នុងតម្លៃនៃការស្នាក់នៅ និងទទួលបានកាហ្វេដោយឥតគិតថ្លៃពេញមួយថ្ងៃទៀតផង។

គួរឲ្យដឹងដែរថា សណ្ឋាគារខាងលើនេះ ក៏មានសាខានៅឯទីក្រុង Kyoto និងទីក្រុង Fukuoka ដែរ៕

សូមទស្សនារូបភាពខាងក្រោម៖