ស្វីស៖ ជាទូទៅកីឡាលោតឆត្រយោង ជាកីឡាមួយប្រភេទ ដែលពេញនិយមសម្រាប់ប្រជាជននៅប៉ែកអឺរ៉ុប ជាពិសេសសម្រាប់អ្នកដែលមិនខ្លាចទីខ្ពស់ ហើយចូលចិត្ដគយគន់ទេសភាពពីលើអាកាស។ យ៉ាងណាមិញ មានសុនខមួយក្បាល ហាក់ទទួលបានការចាប់អារម្មណ៍ខ្លាំងពីសាធារណជន តាមរយៈសមត្ថភាពលោតឆត្រយោងជាមួយនឹងម្ចាស់របស់វាពីកម្ពស់រាប់រយម៉ែត្រ ជាច្រើនលើកច្រើនសារ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
សុនខដ៏ក្លាហានមួយក្បាលនេះ មានឈ្មោះថា Kazuza អាយុ ៦ ឆ្នាំដែលធ្លាប់មានបទពិសោធលោតឆត្រយោងជាង ៤០ ដងជាមួយនឹងម្ចាស់របស់វា លោក Bruno Valente។ ហើយកាលពីពេលថ្មីៗនេះ Kazuza ក៏ទើបបានសាងភាពអស្ចារ្យមួយបន្ថែមទៀតផងដែរ គឺការលោតឆត្រយោងជាមួយនឹងលោក Bruno ចេញពីច្រាំងភ្នំដែលមានកម្ពស់ ២,៣០០ ហ្វីត (ប្រមាណ ៧០០ ម៉ែត្រ) នៅតំបន់ Lauterbrunnen ប្រទេសស្វីស។
លោក Bruno បានប្រាប់ពីមូលហេតុដំបូង ដែលធ្វើឲ្យលោកចាប់ផ្ដើមនាំ Kazuza មកលោតឆត្រជាមួយថា៖
ដោយសារ ពេលខ្ញុំលោតឆត្រយោងម្ដងៗ មិនមាននរណាមើលថែ Kazuza ឡើយ។ ដូច្នេះ ខ្ញុំបានយកខ្សែពួរមួយខ្សែ ដើម្បីចងវានៅពីមុខ ហើយខ្ញុំតែងមើលប្រតិកម្មរបស់វា តែ Kazuza មិនមានភាពភិតភ័យអ្វីឡើយ។ ចាប់តាំងពីពេលនោះមក យើងតែងតែលោតឆត្រជាមួយគ្នា ហើយមកទល់នឹងពេលនេះ បានជាង ៤០ ដងហើយ។
ទន្ទឹមនឹងនេះដែរ លោក Sommer ដែលជាអត្ដពលិកមួយរូបមកពីប្រទេសន័រវែស បានសរសើរ Kazuza ថាជាសុនខ ដែលសំណាងបំផុតលើលោក ហើយក៏ជាសុនខដែលទទួលបានការហ្វឹកហាត់យ៉ាងល្អផងដែរ៕
សូមទស្សនារូបភាព និងវីដេអូខាងក្រោម៖
Bong I.T