ខ្សែភាពយន្តរឿង “ពោះធំ” The Movie ត្រៀមចាក់បញ្ចាំងនៅរោងកុនពីសាច់រឿងបន្តពី Youtube ជាមួយការបញ្ចប់ដែលអ្នកនឹកស្មានមិនដល់

សម្រាប់ហ្វេនៗដែលបានទស្សនារឿង ពោះធំ នៅលើ Youtube ហើយ ប្រាកដជាចង់ដឹងពីណើរជីវិតតួឯកប្រុសស្រីចេញពីផ្ទះមករស់នៅក្រៅតែពីរនាក់ គ្មានឳពុកម្តាយទទួលស្គាល់ទាំងមិនទាន់មានការងារធ្វើចិញ្ចឹមជីវិតនោះនឹងក្លាយទៅជាយ៉ាងណា? តើពួកគេនឹងបែកគ្នាព្រោះតែចុះចាញ់ការលំបាកក្នុងជីវិត ប្ញបន្តរស់នៅជាមួយគ្នាបានដោយមានក្តីសុខជាមួយនឹងកូនក្នុងផ្ទៃរបស់ពួកគេ ដែលយើងនិយមនិយាយថា Happy-Ending ?

ជាក់ស្តែង បើទោះបីជារឿងពោះធំ បានបញ្ចប់ការចាក់បញ្ចាំងតាម Youtube តែសាច់រឿងជីវិតដ៏កម្សត់នេះមិនទាន់បញ្ចប់នោះទេ ពីព្រោះថាសាច់រឿងបន្តពី Youtube ជាមួយការបញ្ចប់ដែលអ្នកទស្សនានឹកស្មានមិនដល់ នឹងចាក់បញ្ចាំងជូនទស្សនានៅគ្រប់រោងភាពយន្តទំនើបៗក្នុងរាជធានីភ្នំពេញ និងបណ្ដាខេត្តនៅថ្ងៃទី២៦ ខែមីនា ឆ្នាំ២០២០ ខាងមុខនេះហើយ។

អ្វីដែលពិសេសនោះ ខ្សែភាពយន្តរឿងពោះធំ The Movie ដែលជា Version រោងកុន ត្រៀមចាក់បញ្ចាំងក្នុងពេលឆាប់ៗខាងមុខនេះ គឺមានភាពខុសប្លែកពីរឿងពោះធំ Version អនឡាញ ដែលធ្លាប់ចាក់បញ្ចាំងតាម Youtube របស់ផលិតកម្ម Sastra Film ព្រោះមានការថតឈុតឆាកថ្មីទាំងអស់សម្រាប់បញ្ចាំងជាភាពយន្ត ដែលជាសាច់រឿងថ្មីបន្តពីជីវិតរបស់តួឯកប្រុសស្រីសម្តែងដោយកញ្ញា អាំង សុជាតា និងលោក ស៊ីវ សុវណ្ណារាជ្យ ក្រោយពេលចាកចេញពីផ្ទះ ទៅផ្សងជីវិតគ្មានទីជម្រក តស៊ូលំបាកវេទនា ដោយគ្មានការទទួលស្គាល់ពីឳពុកម្តាយ ក្នុងពេលដែលតួស្រីកំពុងមានផ្ទៃពោះវ័យក្មេង ។ តើវាសនាឳពុកម្តាយក្មេងខ្ចីនេះនឹងទៅជាយ៉ាងណា? ពួកគេនឹងឈ្លោះគ្នា ប្ញបន្តចាប់ដៃគ្នាតស៊ូឆ្លងកាត់ឆាកជីវិតដ៏កម្សត់ជាមួយកូនក្នុងផ្ទៃ? ធានាថាឈុតឆាកថ្មីនេះនឹងកាន់តែធ្វើឱ្យអ្នកទស្សនាទប់ទឹកភ្នែកមិនជាប់ អាណិតឆាកជីវិតរបស់ពួកគេ និងស្រាយចម្ងល់អ្នកទស្សនាតាមអនឡាញ ពីវាសនារបស់ពួកគេនិងកូនក្នុងពោះជាចុងក្រោយនឹងទៅជាយ៉ាងណា ជាពិសេសគឺការបញ្ចប់មួយ ដែលលោកអ្នកនឹកស្មានមិនដល់ថានឹងក្លាយជាបែបនោះ។

ដូច្នេះប្រសិនបើពុកម៉ែបងប្អូនចង់ដឹងថា Version ថ្មីដែលត្រៀមចាក់បញ្ចាំងនៅរោងភាពយន្តនេះមានឈុតឆាកខុសប្លែកយ៉ាងណា ក្រោយពីតួឯកប្រុសស្រីចេញពីផ្ទះមករស់នៅក្រៅតែពីរនាក់នោះកុំភ្លេចតាមដានទាំងអស់គ្នា នឹងមានចាក់បញ្ចាំងនៅគ្រប់រោងភាពយន្តទំនើបៗក្នុងរាជធានីភ្នំពេញ និងបណ្ដាខេត្តនៅថ្ងៃទី២៦ ខែមីនា ឆ្នាំ២០២០ ខាងមុខនេះហើយ។

គួរបញ្ជាក់ផងដែរថា រឿង “ពោះធំ” The Movie របស់ផលិតកម្ម Sastra Film ជាប្រភេទភាពយន្តបែបកម្សត់បង្កប់ទៅដោយអត្ថន័យអប់រំជាច្រើនក្នុងរឿង ពិសេសគឺផ្ដោតសំខាន់ទៅលើមិត្តយុវវ័យតែម្ដង ដែលឆាប់ប្រឡូករឿងផ្លូវភេទទាំងខ្លួននៅវ័យក្មេង។ ជាក់ស្ដែងក្នុងភាពយន្ត”ពោះធំ” នេះតួឯកប្រុសស្រី គឺជាសិស្សសាលាកំពុងតែសិក្សានៅថ្នាក់វិទ្យាល័យ តែពួកគេទាំងពីរបានស្រឡាញ់ទាក់ទងគ្នាជ្រុលជ្រួសរហូតដល់មានកូនដោយមិនបានព្រៀងទុក។ ក្រោយមកគូស្នេហ៍វ័យក្មេងមួយគូនេះត្រូវបានចាកចេញពីផ្ទះទៅរស់នៅតែពីរនាក់យ៉ាងលំបាកវេទនាបន្ទាប់ពីបែកធ្លាយរឿងដល់ឪពុកម្ដាយ៕

សូមទស្សនាវីដេអូ Trailer ខ្សែភាពយន្ត ពោះធំ The Movie របស់ផលិតកម្ម Sastra Film