នី រតនា និង វី ឌីណែត ត្រៀមបង្ហាញមុខរួមគ្នាលើ កញ្ចក់ទូរទស្សន៍ក្នុងរឿងភាគមួយនេះ (មានវីដេអូ)

ភ្នំពេញ៖ លោក នី រតនា អតីតម្ចាស់ជ័យលាភី Cambodian Idol រដូវកាលទីមួយ និងជាតារាចម្រៀងប្រចាំផលិតកម្មរស្មីហង្សមាស បច្ចុប្បន្ននេះកំពុងត្រៀមខ្លួនមកផ្លាស់ប្តូរចំណីអារម្មណ៍របស់ទស្សនិកជន ជាពិសេសអ្នកគាំទ្រ តាមរយៈការសម្តែងខ្សែភាពយន្តភាគជាលើកដំបូងនៅលើកញ្ចក់ទូរទស្សន៍ហង្សមាស ដោយចាប់ដៃគូជាមួយនឹងតារាស្រីសម្លេងខ្លាំង វី ឌីណែត នោះគឺរឿង រាជបុត្រកង្កែប ក្នុងពេលឆាប់ៗនេះ។

ខ្សែភាពយន្តភាគមួយនេះជាប្រភេទសាច់រឿងមនោសញ្ចេតនា បែបកំប្លែង ដែលនិយាយពីតួអង្គម្នាក់ឈ្មោះដេវីត (សម្តែងដោយ នី រតនា) ជានាយកប្រតិបត្តិនៃសណ្ឋាគារដ៏ធំមួយ ហើយថែមទាំងជាអ្នកស្នងមរតកមហាសាលដ៏គួរឱ្យស្អប់ ចិត្តត្រជាក់ និងគ្មានមេត្តា។ ឧបទ្ទវហេតុមួយបានធ្វើឲ្យលោកត្រូវបាត់បង់ការចងចាំ ហើយក៏ប្រែក្លាយជាមនុស្សចិត្តល្អ មានធម៌មេត្តា និងគួរឲ្យស្រឡាញ់។

ក្រោយមក ជីវិតលោកត្រូវជួបប្រទះនឹងរឿងរ៉ាវដែលនឹកស្មានមិនដល់ជាច្រើនទៀត។ ក្រៅពីតួអង្គឯកទាំងពីរខាងលើ ខ្សែភាគយន្តភាគថ្មីមួយនេះ ក៏មានការចូលរួមសម្តែងពី ម្ចាស់ពាន The Voice រដូវកាលទី២ ថែល ថៃ និង អ្នកនាង សួស វីហ្សា រួមទាំងវត្តមានតារាល្បីៗជាច្រើនរូបផ្សេងទៀត៕

សូមទស្សនាឈុតខ្លីៗខាងក្រោម៖