អុញ! ជួបគ្នាឥឡូវ លែងចាប់ដៃស្វាគមន៍ហើយ ប៉ះជើងគ្នាម្ដង ដើម្បីបង្ការវីរុស Covid-19 (មានវីដេអូ)

ចិន៖ មហាជនអ្នកលេងបណ្ដាញសង្គម ជាច្រើនបានសម្ដែងនូវការអស់សំណើចយ៉ាងខ្លាំង ជុំវិញវីដេអូឃ្លីបខ្លីមួយ ដែលត្រូវបានគេថតបង្ហោះចែកចាយ នូវសកម្មភាពបុរសជនជាតិចិនមួយក្រុម បានជួបគ្នា ដោយមិនចាប់ដៃស្វាគមន៍ និងជំនួសដោយការប៉ះជើងគ្នាទៅវិញទៅមក កំឡុងពេលវីរុសកូរ៉ូណា ឬ Covid-19 កំពុងវាយលុក។

វីដេអូឃ្លីបមួយនេះ ត្រូវបានថតឡើងនៅក្នុងទីក្រុង Ningbo ប្រទេសចិន កាលពីពេលថ្មីៗនេះ និងត្រូវបានគេយកទៅបង្ហោះចែកចាយលើបណ្ដាញសង្គមចិន Weibo ដោយទទួលបានការចាប់អារម្មណ៍យ៉ាងខ្លាំង។

ជាក់ស្ដែងតាមរយៈវីដេអូឃ្លីប បង្ហាញឲ្យឃើញថា បុរសម្នាក់ បានចុះពីលើរថយន្ដ និងជួបជាមួយអ្នកដែលស្គាល់គ្នា។ តែនៅពេលគេប្រុងចូលទៅចាប់ដៃរបស់គាត់ ទុកជាការស្វាគមន៍ បែរជាគាត់ឃាត់ ហើយយកជើងទៅប៉ះជើងគ្នាទៅវិញទៅមក។

បើងាកទៅកាន់ប្រទេសអាលឺម៉្លងវិញ រដ្ឋមន្រ្តីក្រសួងមហាផ្ទៃលោក Horst  Seehofer បានបដិសេធមិនចាប់ដៃស្វាគមន៍ជាមួយនឹង អធិការបតី Angela  Merkel ក្នុងការជួបជុំពិភាក្សាមួយកាលពីប៉ុន្មានថ្ងៃកន្លងទៅនេះ។ ក្រោយមក លោក Horst Seehofer ក៏បានបកស្រាយប្រាប់សារព័ត៌មានក្នុងប្រទេសដែរថា រូបគាត់ផ្ទាល់ឈប់ចាប់ដៃនរណាម្នាក់ទៀតហើយ កំឡុងពេលវីរុស Covid-19 រាតត្បាតឥតឈប់ឈរ ហើយគាត់ក៏សង្ឃឹមថា នឹងមានវ៉ាក់សាំងការពារវីរុសនេះក្នុងពេលឆាប់ៗ៕

សូមទស្សនារូបភាពនិងវីដេអូខាងក្រោម៖