កម្រណាស់! កើតបានកូនភ្លោះមួយគូក្នុងថ្ងៃទិវានៃក្ដីស្រលាញ់កាលពីឆ្នាំ២០១៥ លុះមកដល់ថ្ងៃដដែលក្នុងឆ្នាំ២០២០ កើតបានមួយគូទៀត

ចក្រភពអង់គ្លេស៖ អ្នកស្រី Joanna Gregory វ័យ៤០ឆ្នាំ មកពី West Wales បានឈ្នះភ្នាល់ហាងឆេងក្នុងចំណោមមនុស្ស៣២លាននាក់ បន្ទាប់ពីគាត់សម្រាលបានកូនភ្លោះស្រីមួយគូ នៅថ្ងៃទិវានៃក្ដីស្រលាញ់ ជាលើកទីពីរក្នុងរយៈពេលប្រាំឆ្នាំ។

អ្នកស្រីសម្រាលបានកូនភ្លោះស្រីមួយគូម្ដងរួចមកហើយ ដែលមានឈ្មោះថា Lola និង Lexie នៅថ្ងៃទិវានៃក្ដីស្រលាញ់ក្នុងឆ្នាំ២០១៥។ លុះមកដល់ឆ្នាំ២០២០នេះ គាត់ក៏សម្រាលបានកូនភ្លោះស្រីមួយគូទៀត នៅថ្ងៃទិវានៃក្ដីស្រលាញ់ដដែល ហើយមានឈ្មោះ Ella និង Ava។

អ្នកស្រី Joanna បានឲ្យដឹងដែរថា រូបគាត់ផ្ទាល់មានអារម្មណ៍រំភើបផង និងកើតទុក្ខផង ព្រោះតែបន្ទាប់ពីសម្រាលរួច កូនទាំងពីរ ត្រូវចាំបាច់ដាក់អុកស៊ីសែន និងចំណាយអស់រយៈពេលជាច្រើនថ្ងៃសម្រាកនៅមន្ទីរពេទ្យ។ ហើយកូនស្រីម្នាក់ឈ្មោះ Ella មានបញ្ហានឹងទម្ងន់យ៉ាងគួរឲ្យបារម្ភ ដូច្នេះវេជ្ជបណ្ឌិតបានផ្ទេរទៅកាន់ខាងថែទាំសុខភាពពិសេសនៅក្នុងទីក្រុង Newport។

យ៉ាងណាមិញ ឥឡូវនេះ ទារិកា Ava បានដកអុកស៊ីសែនចេញហើយ និងអាចបៅទឹកដោះគោបានទៀតផង។ អ្នកស្រីក៏សង្ឃឹមដែរថា ទារិកា Ella នឹងមានសុខភាពល្អប្រសើរឡើងវិញ ក្នុងពេលឆាប់ៗខាងមុខនេះ៕

សូមទស្សនារូបភាពខាងក្រោម៖