ជឿថាម៉ាក់ប៉ាដែលរស់នៅភ្នំពេញសព្វថ្ងៃច្រើនតែបញ្ជូនកូនទៅរៀនតាំងពីនៅវ័យក្មេង ព្រោះដើម្បីឲ្យគ្រូជួយមើលថែ និងឆាប់ទទួលបានចំណេះដឹង។ ទោះជាបែបនេះក្ដី ក្មេងដែលឆាប់ចូលរៀនពេកអាចមានបញ្ហាសំខាន់ ៣ យ៉ាង ដែលអ្នកគ្រូ សន សុចិន្តា បង្រៀននៅសាលាឯកជនថ្នាក់មតេ្តយ្យ ចង់ឲ្យប៉ាម៉ាក់ពិចារណាម្ដងទៀតមុនបញ្ជូនកូនទៅ៖
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស១- ងាយឆ្លងជំងឺផ្សេងៗ
ក្មេងចូលរៀនក្រោមអាយុ ៣ ឆ្នាំប្រឈមមុខការឆ្លងមេរោគខ្ពស់ជំងឺផ្សេងៗពីមិត្តរួមថ្នាក់ ដោយសារតែកូននៅវ័យប៉ុណ្ណេះប្រព័ន្ធភាពស៊ាំរបស់រាងកាយមិនទាន់រឹងមាំដូចក្មេងអាយុ ៥ ឆ្នាំឡើងទៅទេ។ ក្មេងដែលចូលរៀនក្រោម ឬចាប់ពីអាយុ ៣ ឆ្នាំ ឡើងគឺត្រឹមយកកូនទៅផ្សាំជាមួយសាលា និងមនុស្សដទៃ ដើម្បីកុំឲ្យខ្លាចគេប៉ុណ្ណោះ មានមិត្តភ័ក្តិច្រើន បើនិយាយពីការបង្រៀនចំណោះដឹង គឺមិនទាន់ចាប់បានច្រើនឡើយ ហើយម៉ាក់ប៉ាភាគច្រើន គឺដើម្បីយកកូនទៅ ព្រោះមិនមានអ្នកមើលថែទាំ ហើយខ្លួនត្រូវចេញទៅធ្វើការទាំងពីរនាក់។ ដូចនេះបើមានក្មេងម្នាក់ឈឺក្នុងថ្នាក់ដូចជាផ្ដាសាយ ក្អក ភាគរយឆ្លងទៅមិត្តភ័ក្ដិមានខ្ពស់ ព្រោះក្មេងត្រូវលេង ញ៉ាំ និងគេងជាមួយគ្នា ហើយបើទោះជាបានឲ្យថ្នាំលេប និងលាងសម្អាតដៃ កម្ចាត់មេរោគ ក៏នៅតែមិនអាចទប់ស្កាត់បានច្រើនមនុស្សធំដែរ។ បែបនេះខាតទាំងថវិកា ខាតពេលធ្វើការរកស៊ីបន្ថែមទៀត ហើយសុខភាពកូនក៏ចាប់ផ្ដើមចុះខ្សោយផងដែរ។
២- ញ៉ាំមិនសូវគ្រប់គ្រាន់
មិនមែនសាលាខ្វះខាតអាហារូបត្ថម្ភទេ តែជារឿងពិបាកផ្គាប់ចិត្តក្មេងញ៉ាំអាហារ ព្រោះក្មេងៗចូលចិត្តញ៉ាំតែសាច់ មិនញ៉ាំបន្លែ ឬចូលចិត្តញ៉ាំតែអាហារបែបឆា អាំង ចៀន ខណៈដែលនៅសាលាមិនអាចតម្រូវបែបនេះបានគ្រប់ពេលឡើយ។ ដោយមានថ្ងៃខ្លះសម្លទឹក ថ្ងៃខ្លះសាច់អាំង ចៀន ហើយការញ៉ាំទៀតសោត ទាមទារឲ្យបញ្ចុកទើបញ៉ាំបានច្រើន តែអ្នកថែទាំម៉ោងបាយមានមិនច្រើន មិនអាចផ្គត់ផ្គង់ក្មេងបានគ្រប់គ្នា ហើយមួយវិញទៀត យើងទម្លាប់នៅផ្ទះបញ្ចុកបាយកូន ឬយកគ្រឿងអេឡិចត្រូនិកដោះដូរជាមួយការញ៉ាំ។ ដូចនេះហើយបានជាក្មេងខ្លះពេលចូលរៀនប្រែប្រួលទម្ងន់ តែសម្រាប់ក្មេងមិនរើសអាហារគឺមានតែធាត់ជាមុន។
៣- មិនបានគេងថ្ងៃ
ជាធម្មតាពេលកូននៅផ្ទះយើងទម្លាប់ឲ្យកូនគេងនៅពេលថ្ងៃ ហើយនៅសាលាក៏មានដូចគ្នា ប៉ុន្តែក្មេងៗពេលនៅជុំគ្នា ទោះជាដល់ម៉ោងគ្រូប្រាប់ឲ្យចូលសម្រាក ក៏ពួកគេមិនធ្វើតាមដែរ ហើយនៅពេលត្រឡប់ទៅផ្ទះវិញគ្រូតែងដាក់កិច្ចការងារផ្ទះឲ្យធ្វើ។ តែព្រោះមិនបានគេងថ្ងៃ ធ្វើឲ្យពួកគេមិនអាចបំពេញបានល្អ ឬក្មេងខ្លះឲ្យម៉ាក់ប៉ាជាអ្នកធ្វើជំនួសទៀតផង ដែលធ្វើឲ្យការទទួលបានចំណេះដឹងកាន់តែតិចឡើងៗ មិនសក្ដិសមជាមួយថវិការដែលចំណាយ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
អត្ថបទផ្ដល់សិទ្ធិដោយ Hello Krupet
Bong I.T