៤ឆ្នាំម្តង! លោកយាយអាយុ ១០០​ឆ្នាំដែលកើតថ្ងៃ ២៩ កុម្ភៈ ធ្វើខួប​កំណើត​​​​ទើបបាន​ ២៥ដង​ប៉ុណ្ណោះ​

លោកយាយ Angie Crognale មានអាយុ ១០០ ឆ្នាំ ទើបតែបានប្រារព្ធខួបកំណើតរបស់ខ្លួនលើកទី ២៥។​ លោកយាយកើតនៅឆ្នាំ ១៩២០ តែលោកយាយមានឱកាសធ្វើខួបកំណើតបានត្រឹមម្តងក្នុង ៤ ឆ្នាំប៉ុណ្ណោះ។

លោកយាយកើតនៅថ្ងៃទី ២៩ ខែកុម្ភៈ ឆ្នាំ១៩២០ ជាកូនរបស់ជនអន្តោប្រវេសន៍ជនជាតិអុីតាលីដែលបានរស់នៅ Port Norris រដ្ឋ New Jersey ហើយទើបផ្លាស់ទីលំនៅមកភូមិ Cardinal នៅអាយុ ៧៦ឆ្នាំ។

លោកយាយបានចំណាយពេលជាច្រើនរបស់គាត់ជាមួយមិត្តជិតស្និទ្ធរបស់គាត់ឈ្មោះ Dolores Monzo និង Mildred Annucci ដែលរស់នៅភូមិជាមួយគ្នា។ លោកយាយចូលនិវត្តន៍ពីការងារជាអ្នកលក់ដូរនៅផ្សារលក់ទំនិញនៅអាយុ ៩៩ឆ្នាំ ហើយបច្ចុប្បន្ន​ចំណាយពេលសម្រាក លេងប៊ីងហ្គោ និងញ៉ាំអាហារជាមួយមិត្តភក្តិ។

ពេលគេសួរលោកយាយថាធ្វើយ៉ាងដូចម្តេចទើបសុខភាពល្អ និងអាយុវែង លោកយាយបាននិយាយថា៖

«សូមធ្វើល្អទៅកាន់អ្នកដទៃ និងរស់នៅដោយសប្បាយចិត្ត។ នេះជារឿងរ៉ាវនៃជីវិតរបស់ខ្ញុំ»៕