លោកយាយកើតចំថ្ងៃទី២៩ ខែកុម្ភៈ ក្នុងឆ្នាំ១៩៣៦ ពេលនេះមានវ័យ២១ឆ្នាំ និងទើបតែស្គាល់រសជាតិគ្រឿងស្រវឹង ជាលើកដំបូងក្នុងឆាកជីវិត (មានវីដេអូ)

បរទេស៖ លោកយាយម្នាក់ឈ្មោះថា Arlene Manko បានកើតនៅថ្ងៃទី២៩ ខែកុម្ភៈ ឆ្នាំ១៩៣៦ ដែលជាឆ្នាំបង្គ្រប់ ហើយគាត់ត្រូវឈានចូលវ័យ៨៤ឆ្នាំកាលពីថ្ងៃសៅរ៍ ម្សិលមិញនេះ។ តែដោយសារថ្ងៃទី២៩ នៃខែកុម្ភៈ ក្នុង​រយៈពេល៤ឆ្នាំមានតែម្ដង ដូច្នេះ លោកយាយទើបតែចូលវ័យ២១ឆ្នាំប៉ុណ្ណោះ។

ឆ្លៀតក្នុងឱកាសដ៏ពិសេសនេះ លោក Ryan Reynolds ដែលជាតួអង្គនៅក្នុងរឿង Deadpool បានរៀបចំថតវីដេអូផ្សព្វផ្សាយពាណិជ្ជកម្មមួយសម្រាប់ក្រុមហ៊ុនស្រា Aviation Gin ដោយឲ្យលោកយាយបានស្គាល់រសជាតិស្រាជាលើកដំបូង។

យោងតាមវីដេអូពាណិជ្ជកម្មបែបកំប្លែងដែលក្រុមហ៊ុនចេញផ្សាយ បានបង្ហាញឲ្យឃើញថា លោកយាយ Arlene ត្រូវបានគេណែនាំថា មិនមែនជាតួអង្គសម្ដែងឡើយ ហើយទិដ្ឋភាពការសម្ភាស៍ទាំងស្រុង ថតឡើងនៅក្នុងផ្ទះរបស់លោកយាយផ្ទាល់តែម្ដង។ បន្ទាប់មកមានឈុតឆាកមួយ លោកយាយ បានបង្ហាញអត្តសញ្ញាណប័ណ្ណទៅកាន់បុគ្គលិកក្នុងហាងលក់ស្រាមួយកន្លែង ដោយបុគ្គលិកបញ្ចេញទឹកមុខពោរពេញទៅដោយចម្ងល់។ 

លោកយាយ Arlene ក៏បានឲ្យដឹងដែរថា រូបគាត់ផ្ទាល់ គំរប់ខួបទើបតែ៥ឆ្នាំប៉ុណ្ណោះនៅពេលរៀបអាពាហ៍ពិពាហ៍ និងមានកូនចំនួន៧នាក់ក្នុងកំឡុងពេល១០ឆ្នាំ។ ហើយមានពេលខ្លះ គាត់ក៏ចង់ផឹកស្រាដែរ។ ការរង់ចាំអស់រយៈ​ពេលចំនួន ៣០,៦៧៩ថ្ងៃ (៨៤ឆ្នាំ) ទីបំផុតគាត់បានឈានចូលវ័យ២១ឆ្នាំ ដែលជាវ័យស្របច្បាប់ អាចនឹងទទួលទានគ្រឿងស្រវឹងបាន។

យ៉ាងណាមិញ នៅក្នុងថ្ងៃខួបកំណើតអាយុ២១ឆ្នាំ លោកយាយក៏បានភ្លក្សរសជាតិស្រាមួយក្រេប ដែលជាលើកដំបូងក្នុងឆាកជីវិត ដោយទឹកមុខភ្ញាក់ផ្អើលនិងលាន់មាត់ថា «Holly Moses»៕

សូមទស្សនារូបភាពនិងវីដេអូខាងក្រោម៖