កក្រើកលីគកំពូលកម្ពុជា! ចាន់ វឌ្ឍនាកា តែតមួយគ្រាប់ជួយ បឹងកេត វាយបកតាមស្មើ ណាហ្គាវើល (មានវីដេអូ)

ភ្នំពេញ៖ ម្ចាស់ផ្ទះនាគខៀវបឹងកេត បានត្រឹមចែកគ្នាម្នាក់មួយពិន្ទុជាមួយក្រុមភ្ញៀវណាហ្គាវើល ក្នុងការប្រកួតសប្ដាហ៍ទី០៣ ក្របខណ្ឌលីគកំពូលកម្ពុជា Metfone Cambodian League ក្រោយស្មើ ១-១ កាលពីម្សិលមិញ ក្រោមក្រសែភ្នែកអ្នកគាំទ្រចូលរួមទស្សនាផ្ទាល់ជិត ២ម៉ឺននាក់នៅកីឡដ្ឋាន Cambodia Airways។

ក្រុមរបស់លោក មាស ចាន់ណា ជាអ្នកបើកការនាំមុខមុននៅក្នុងការប្រកួតនោះ ដោយគ្រាប់បាល់របស់កីឡាករជប៉ុន Naruse Yuta នៅនាទីទី២១។ យ៉ាងណាមិញ រំលងបានត្រឹម២២នាទី ម្ចាស់ផ្ទះបឹងកេត បានវាយបកតាមស្មើវិញ ដោយការតែតបញ្ចូលទីយ៉ាងល្អរបស់ខ្សែប្រយុទ្ធជួរមុខ ចាន់ វឌ្ឍនាកា នៅនាទីទី៤៣។ ចប់វគ្គទី១ ក្រុមទាំងពីរស្មើគ្នា ១-១។

បើទោះបីជាមានការសម្រុកគ្នាទៅវិញទៅមកខ្លាំងនៅក្នុងវគ្គទី២ ប៉ុន្តែក្រុមទាំងពីរនៅតែមិនអាចរកទម្លុះសំណាញ់ទីគ្នាបានោះទេ ដោយលទ្ធផលស្មើគ្នា ១-១ បានបន្តរក្សារហូតដល់បញ្ចប់ការប្រកួត។

សម្រាប់លទ្ធផល ២គូផ្សេងទៀតដែលប្រកួតថ្ងៃសៅរ៍ម្សិលមិញមានដូចជា៖

• អគ្គិសនីកម្ពុជា ២-០ សាលាបាល់ទាត់ជាតិបាទីអាយុក្រោម១៨ឆ្នាំ

• ភ្នំពេញក្រោន ៦-០ អាស៊ឺ អឺរ៉ុប យូណាយធីត

សម្រាប់នៅថ្ងៃអាទិត្យនេះ ក៏មានការប្រកួតចំនួន៣គូផ្សេងទៀតដែរគឺ៖

• អង្គរថាយហ្គឺរ vs គិរីវង់សុខសែនជ័យ (៣:៣០នាទីរសៀល កីឡដ្ឋាន SRU)

• វិសាខា vs សូទីឡូអង្គរ (៦:០០នាទីល្ងាច កីឡដ្ឋានព្រីនស៍)

• ព្រះខ័នរាជស្វាយរៀង vs កងយោធពលខេមរភូមិន្ទ (៦:០០នាទីល្ងាច កីឡដ្ឋានស្វាយរៀង)

គួរឲ្យដឹងផងដែរថា សម្រាប់រដូវកាល ២០១៩-២០២០ សហព័ន្ធកីឡបាល់ទាត់កម្ពុជា និងគណៈកម្មការរៀបចំការប្រកួតបាល់ទាត់ជាតិ (CNCC) បានសម្រេចបង្កើនប្រាក់រង្វាន់ដល់ក្រុមជើងឯកពានរង្វាន់លីកកំពូលកម្ពុជា​ Metfone Cambodian League ដល់ទៅ ១៥០លានរៀល៕

ចង់ឃើញថា មួយគ្រាប់របស់ ចាន់ វឌ្ឍនាកា ជួយ បឹងកេត តាមស្មើណាហ្គាយ៉ាងណានោះ ទៅទស្សនាវីដេអូខាងក្រោមទាំងអស់គ្នា៖