អង់គ្លេស៖ អ្នកចាត់ការទូទៅក្រុមបិសាចក្រហម Manchester United លោក Ole Gunnar Solskjaer ត្រូវបានគេរាយការណ៍ថា បានដាក់គោលដៅផ្ទេរយកខ្សែបម្រើស្លាបក្រុម Fiorentina កីឡាករ Federico Chiesa ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សខ្សែបម្រើវ័យ២២ឆ្នាំ បានបង្ហាញទម្រង់លេងគួរឲ្យភ្ញាក់ផ្អើលក្នុងរដូវកាលនេះ បន្ទាប់ពីស៊ុតបញ្ចូលទីបាន ៧ គ្រាប់និងបញ្ជូនបាល់ឲ្យមិត្តរួមក្រុមសម្រេចទីបាន ៥ ដងក្នុងចំណោមការបង្ហាញខ្លួន ២៥ ប្រកួត។
តាមសេចក្ដីរាយការណ៍បានឲ្យដឹងថា លោក Solskjaer មានគម្រោងពង្រឹងតំបន់ប្រយុទ្ធផ្នែកខាងស្ដាំ ហើយទម្រង់លេងក៏ដូចជាជំនាញរបស់ កីឡាករ Chiesa ហាក់ស័ក្តិសមនឹងចំណុចដែលគ្រូបង្វឹកសញ្ជាតិន័រវេសចង់បាន។
យ៉ាងណាមិញ យោងតាមការចុះផ្សាយរបស់កាសែត MailOnline លោក Solskjaer បានបញ្ជូនតំណាងរបស់លោក ទៅទស្សនាការប្រកួតរវាងក្រុម Fiorentina ទល់នឹងក្រុម AC Milan កាលពីថ្ងៃសៅរ៍សប្ដាហ៍មុន ក្នុងគោលបំណងតាមដានទម្រង់លេងក៏ដូចជាសមត្ថភាពរបស់កីឡាករ Chiesa។
ប្រភពខាងលើបានបន្ថែមទៀតថា ក្លិប Fiorentina បានដាក់តម្លៃខ្លួនខ្សែបម្រើសញ្ជាតិអ៊ីតាលីរូបនេះ ក្នុងតម្លៃ ៦០ លានផោន (ឬប្រមាណ ៧៦,៩ លានដុល្លារ)។ ខណៈក្រុមសេះបង្កង់ Juventus ក៏ត្រូវបានគេរាយការណ៍មកថា មានចំណាប់អារម្មណ៍ក្នុងការផ្ទេរកីឡាករ Chiesa ផងដែរ។
គួរឲ្យដឹងដែរថា ខ្សែបម្រើ Federico Chiesa ជាយុវជនថ្នាលរបស់ក្រុម Fiorentina។ គេត្រូវបានក្លិបផ្ដល់ឱកាសឲ្យបង្ហាញខ្លួនក្នុងឈុតធំ កាលពីឆ្នាំ ២០១៦ ។ គិតមកទល់ពេលនេះ គេចូលលេងក្នុងក្របខណ្ឌ Serie A បាន ១២២ ប្រកួត ស៊ុតបញ្ចូលទីបាន ២១ គ្រាប់ និងបញ្ជូនបាល់ឲ្យមិត្តរួមក្រុមសម្រេចទីបាន ១៨ ដង៕
ប្រភព៖ metro