បរទេស៖ អង្គការសុខភាពពិភពលោក (WHO) បាននិយាយកាលពីថ្ងៃព្រហស្បតិ៍ម្សិលមិញថា ប្រទេសទាំងអស់នៅទូទាំងពិភពលោកចាំបាច់ត្រូវត្រៀមខ្លួនឱ្យបានរួចជាស្រេច ដើម្បីប្រយុទ្ធប្រឆាំងជាមួយនឹងវីរុសឆ្លងកូរ៉ូណា។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សប្រធានអង្គការសុខភាពពិភពលោក Tedros Adhanom Ghebreyesus បាននិយាយថា របាយការណ៍ថ្មីៗនៃចំនួនអ្នកឆ្លងវីរុសកូរ៉ូណាត្រូវបានគេរាយការណ៍នៅជុំវិញពិភពលោក ហើយឥឡូវនេះចំនួនអ្នកស្លាប់រួមជាមួយនឹងចំនួនឆ្លងវីរុសកូរ៉ូណាកំពុងតែកើនឡើងពីមួយថ្ងៃទៅមួយថ្ងៃ។ ដូច្នេះប្រទេសអ្នកមានផ្សេងៗទៀតក៏ត្រូវតែត្រៀមខ្លួនដែរ ដើម្បីទប់ស្កាត់ការរីករាលដាលនៃជំងឺនេះ។
លោក Tedros បានបន្ថែមទៀតថា គ្មានប្រទេសណាមួយអាចសន្មតថានឹងមិនមានករណីអ្នកឆ្លងជំងឺនោះទេ ហើយប្រសិនបើដូច្នោះមែន វាអាចជាកំហុសដ៏ធ្ងន់ធ្ងរបំផុត។ តួយ៉ាងដូចជា ប្រទេសអ៊ីតាលី មនុស្ស ១៧ នាក់បានស្លាប់បាត់បង់ជីវិតក្នុងមួយប៉ប្រិចភ្នែក ដោយសារតែការផ្ទុះឡើងនៃវីរុសឆ្លងកូរ៉ូណានេះ។
យោងតាមតួលេខរបស់អង្គការសុខភាពពិភពលោកបានឱ្យដឹងថា វីរុសកូរ៉ូណាបានរាតត្បាតក្នុងប្រទេសចិនខ្លាំងជាងគេបំផុត ដែលបណ្តាលមនុស្សប្រមាណ ៨ ម៉ឺននាក់បានឆ្លងជំងឺនេះ ចំណែកមនុស្សប្រមាណ ២,៧៨៨ នាក់ផ្សេងទៀតបានស្លាប់បាត់បង់ជីវិត។ លើសពីនេះទៀត វីរុសនេះក៏បានរាលដាលដល់ប្រទេសចំនួន ៤៦ ផ្សេងទៀតនៅលើពិភពលោក ដែលបណ្តាលឱ្យមនុស្សចំនួន ៥៧ នាក់បានស្លាប់ និង ៣,៧០០ នាក់ផ្សេងទៀតបានឆ្លងជំងឺដ៏កាចសាហាវនេះនេះ៕