ភ្នំពេញ៖ ក្លិបបាល់ទាត់ព្រះខ័នរាជស្វាយរៀង នឹងត្រូវបើកទ្វាពហុកីឡដ្ឋានជាតិទទួលស្វាគមន៍ក្រុមភ្ញៀវ Bali United ក្នុងការប្រកួតទីពីរ ពូល G ពានរង្វាន់ AFC Cup 2020 ដែលការប្រកួតនឹងធ្វើឡើងនៅវេលាម៉ោង ៦:០០ ល្ងាចនេះ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សជុំវិញការធ្វើដំណើរមកដល់ទឹកដីនៃព្រះរាជាណាចក្រកម្ពុជា គ្រូបង្វឹករបស់ក្លិប Bali United លោក Eko Purijianto បានប្រាប់នៅក្នុងសន្និសីទសារព័ត៌មានមុនការប្រកួតថា ក្រុមរបស់លោកធ្វើដំណើរមកកម្ពុជា ដើម្បីយក៣ពិន្ទុពីព្រះខ័នរាជស្វាយរៀង។ លោកបានឲ្យដឹងថា ក្រុមរបស់លោកបានហ្វឹកហាត់ត្រៀមខ្លួនយ៉ាងពេញលេញ សម្រាប់ការប្រកួតថ្ងៃនេះ ហើយលោកសង្ឃឹមថានឹងអាចនាំយក ៣ពិន្ទុត្រឡប់ទៅផ្ទះវិញ។
យ៉ាងណាមិញ អតីតកីឡាករជម្រើសជាតិឥណ្ឌូនេស៊ីរូបនេះ បានឲ្យដឹងថា ក្រុមរបស់លោកក៏មានក្ដីបារម្ភមួយចំនួនទៅលើចំណុចខ្លាំងរបស់ព្រះខ័នរាជស្វាយរៀងផងដែរ គឺកីឡាករបរទេស។ អតីតកីឡាករដែលធ្លាប់ទាត់ចូលទីរបស់ក្រុមជម្រើសជាតិកម្ពុជា២គ្រាប់រូបនេះ បានឲ្យដឹងថា ព្រះខ័នរាជស្វាយរៀង មានកីឡាករបរទេសល្អៗច្រើនដូចជា លេខ៧០ (Pedro Augusto), Privat និងកីឡាករជប៉ុនជាដើម។
គួរឲ្យដឹងផងដែរថា កាលពីប្រកួតបើកឆាក ក្នុងពូល G ព្រះខ័នរាជស្វាយរៀង បានប្រកួតចាញ់ក្លិបលេខ១នៅតំបន់អាស៊ីអាគ្នេយ៍ Ceres-Negros ក្នុងលទ្ធផល ៤-០ ខណៈ Bali United បានយកឈ្នះក្រុមភ្ញៀវវៀតណាម Than Quang Ninh ៤-១៕