ទៀតហើយ! ណាសាត្រូវការអ្នកមានសមត្ថភាព ដើម្បីជួយរចនាយាន សម្រាប់ធ្វើដំណើរលើភពសុក្រ

អាមេរិក៖ ទីភ្នាក់ងារអវកាសណាសាកំពុងព្យាយាមរុករកផ្ទៃរបស់ភពសុក្រ ដោយប្រើប្រាស់យានសម្រាប់ធ្វើដំណើរលើភព ហើយនេះជាអ្វី ដែលមិនធ្លាប់កើតមានពីមុនមកទេ។ ណាសាបាននិយាយថា សីតុណ្ហភាពនៅលើផ្ទៃភពសុក្រ មានកម្ដៅរហូតទៅដល់៤៤៨អង្សាសេ និងសម្ពាធលើផ្ទៃស្មើនឹង៩០ដង នៃសម្ពាធរបស់ផែនដី។ ប៉ុន្តែមន្ទីរពិសោធន៍របស់ណាសា Jet Propulsion Laboratory (JPL) កំពុងបំពេញបេសកកម្ម នៅលើផ្ទៃដីភពដ៏កាចសាហាវនេះ ដោយប្រើប្រាស់យានដែលអាចធន់នឹងបរិស្ថានដ៏ខ្លាំងក្លា Automaton Rover for Extreme Environments (AREE)។

ខណៈដែលបេសកកម្មជាច្រើន បានធ្វើដំណើរទៅកាន់ភពសុក្រ ប្រមាណជា១២នាទី ក៏ផ្ដាច់ការទាក់ទងទៅវិញ ដោយសារតែមិនអាចទ្រាំទ្រនឹងកម្ដៅ និងសម្ពាធដ៏គំហុក។ ណាសាត្រូវការជំនួយ ក្នុងការរចនាឧបករណ៍ដែលអាចរារាំងយាន ធ្វើដំណើរពីការរត់ទៅបុកថ្ម ជម្រាលខ្ពស់ៗ និងស្នាមប្រេះផ្សេងៗ។ ណាសាត្រូវការអ្នកមានសមត្ថភាព ក្នុងការបង្កើតបច្ចេកវិទ្យាថ្មី សម្រាប់បេសកកម្ម ទៅកាន់ភពសុក្រ។ ណាសាបានបន្តទៀតថា ដើម្បីជួយយាន AREE មន្ទីរពិសោធន៍ JPL ត្រូវការឧបករណ៍ដែលបញ្ជៀសពីការបុកទង្គិចឧបសគ្គ។ ដោយសារហេតុផលទាំងនេះ JPL កំពុងចង់ភ្ជាប់ទំនាក់ទំនង ទៅកាន់សហគមន៍ នៅលើពិភពលោក។

មិនមានសញ្ញាបត្រវិស្វកម្មមែនទេ? មិនដែលបានឃើញយានអវកាសដោយផ្ទាល់? នោះមិនមែនជាបញ្ហានោះទេ។ ណាសាបាននិយាយថា JPL ចាប់អារម្មណ៍លើវិធីសាស្ត្រទាំងអស់ ដោយមិនគិតពីបទពិសោធនៃបច្ចេកទេសឡើយ។ ជ័យលាភីលេខ១នៃការប្រកួត នឹងទទួលបានប្រាក់រង្វាន់រហូតដល់ ១៥,០០០ដុល្លារ ចំណែកលេង២នឹងទទួលបាន ១០,០០០ដុល្លារ ហើយអ្នកលេខ៣នឹងទទួលបាន ៥,០០០ដុល្លារ៕