នាយករដ្ឋមន្រ្តីម៉ាឡេស៊ី លោក មហាធៀ មហាម៉ាត បានប្រកាសលាលែងពីតំណែងរបស់ខ្លួននៅថ្ងៃច័ន្ទនេះ ដែលជាការបើកផ្លូវសម្រាប់ការបង្កើតរដ្ឋាភិបាលថ្មីមួយ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សការសម្រេចចិត្តនេះត្រូវបានធ្វើឡើងបន្ទាប់ពីមានការទាស់ទែងផ្នែកនយោបាយ និងការខិតខំប្រឹងប្រែងបង្កើតនូវរដ្ឋាភិបាលថ្មីមួយដោយមិនមានវត្តមានរបស់លោក អានវ៉ា អ៊ីប្រាហ៊ីម ដែលជាដៃគូនយោបាយរបស់លោកមហាធៀ។
លោកមហាធៀ បានថ្លែងនៅក្នុងសេចក្តីថ្លែងការណ៍មួយ ដែលមានសេចក្តីត្រឹមតែពីរប្រយោគថា លោកបានទូលជម្រាបពីសេចក្តីលាលែងរបស់លោកទៅកាន់ព្រះមហាក្សត្រម៉ាឡេស៊ីនៅវេលាម៉ោង ១ រសៀលថ្ងៃនេះ (ម៉ោងនៅទីក្រុងកូឡាឡាំពួរ)។
ជាមួយគ្នានេះដែរ គណបក្សជនជាតិដើមរួបរួមម៉ាឡេស៊ីរបស់លោកមហាធៀ ក៏បានចាកចេញពីសម្ព័ន្តរដ្ឋាភិបាលដែលតែកាន់អំណាចដែលមានឈ្មោះថា Pakatan Harapan (សម្ព័ន្តនៃក្តីសង្ឃឹម) ផងដែរ បើយោងទៅតាមការឲ្យដឹងតាមរយៈបណ្តាញសង្គមរបស់លោក Muhyiddin Yassin ជាប្រធានគណបក្ស។
ការសម្រេចចិត្តរបស់លោក មហាធៀ កើតឡើងបន្ទាប់ពីមានទំនាស់នយោបាយ ក្រោយពីមានសេចក្តីរាយការណ៍នៅយប់ថ្ងៃអាទិត្យថា គណបក្សរបស់លោកគ្រោងនឹងបង្កើតរដ្ឋាភិបាលថ្មីមួយដែលដកចេញអ្នកស្នងតំណែងដែលត្រូវបានកំណត់ទុករបស់លោកមហាធៀ គឺលោក អានវ៉ា អ៊ីប្រាហ៊ីម។
ភាពទាស់ទែងគ្នារវាងគូប្រជែងចាស់គឺ លោក មហាធៀ អាយុ ៩៤ ឆ្នាំនិងលោក អានវ៉ា អាយុ ៧២ ឆ្នាំ គឺជាជំពូកចុងក្រោយនៅក្នុងរឿងនយោបាយដែលអូសបន្លាយពេលយូររវាងឥស្សរជននយោបាយលេចធ្លោពីររូបរបស់ប្រទេសនេះ។
លោកអាន់វ៉ា និងលោកមហាធៀបានរួបរួមគ្នាមុនការបោះឆ្នោតឆ្នាំ ២០១៨ ដើម្បីបណ្តេញរដ្ឋាភិបាលចម្រុះ Barisan Nasional ដែលត្រួតត្រាដោយគណបក្ស UMNO ដែលបានគ្រប់គ្រងប្រទេសម៉ាឡេស៊ីអស់រយៈពេល ៦ ទសវត្សរ៍ នៅក្នុងជ័យជំនះដ៏គួរឱ្យភ្ញាក់ផ្អើលមួយដែលនាំឱ្យមានការទម្លាក់លោកនាយករដ្ឋមន្រ្តី Najib Razak ។
ប៉ុន្តែភាពតានតឹងរវាងអ្នកទាំងពីរនៅក្នុងសម្ព័ន្ធ Pakatan Harapan របស់លោកទាំងពីរបាននិងកំពុងកើនឡើង ខណៈដែលលោក ម៉ាហាធៀមិនព្រមកំណត់ពេលវេលាជាក់លាក់មួយសម្រាប់រក្សាការសន្យារបស់លោកក្នុងការប្រគល់អំណាចទៅឱ្យលោក អាន់វ៉ា។ សំណាងនយោបាយរបស់ក្រុមចម្រុះនេះបាននិងកំពុងធ្លាក់ចុះជាមួយនឹងការបរាជ័យនៅក្នុងការបោះឆ្នោតបំពេញកន្លែងនៅទំនេរ ៥ លើកចុងក្រោយនេះ។
លោកអាន់វ៉ាក៏មានការបែកបាក់ជាមួយមិត្តរួមគណបក្សគឺ លោកម៉ូហាម៉េដ អាហ្សាមីន អាលី រដ្ឋមន្រ្តីក្រសួងការពារជាតិដែលស្ថិតក្នុងចំណោមអ្នកដែលបានចូលរួមប្រជុំនៅយប់ថ្ងៃអាទិត្យ។
គួររំលឹកផងដែរថា លោក អានវ៉ា គឺជាអនុរដ្ឋមន្រ្តីរបស់លោកមហាធៀ កាលដែលលោកធ្វើជានាយករដ្ឋមន្រ្តីដំបូងនៅពីឆ្នាំ ១៩៨១ ដល់ឆ្នាំ ២០០៣ ប៉ុន្តែលោកមហាធៀបានបញ្ឈប់រូបលោក នៅឆ្នាំ ១៩៩៨ បន្ទាប់ពីលោកទាំងពីរមិនយល់ស្របលើវិធីដោះស្រាយវិបត្តិហិរញ្ញវត្ថុ៕
ប្រភព៖ ទូរទស្សន៍ Aljazeera