ចិន៖ ក្រុមគ្រូពេទ្យជំនាញចិនដែលកំពុងបម្រើការនៅជួរមុខប្រឆាំងនឹងការរីករាលដាលនៃវីរុសកូរ៉ូណាបានព្រមានថា អ្នកជំងឺកូរ៉ូណាដែលបានទទួលការព្យាបាលជាសះស្បើយ ក៏នៅតែអាចមានឳកាសចម្លងវីរុសនេះទៅកាន់មនុស្សផ្សេងទៀតដែរ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
លោកវេជ្ជបណ្ឌិត Zhao Jianping ដែលជាប្រធានក្រុមកំពុងធ្វើការនៅជួរមុខទប់ស្កាត់ការផ្ទុះឡើងនៃវីរុសកូរ៉ូណាក្នុងខេត្តហ៊ូប៉ីបាននិយាយថា៖
មានករណីជាច្រើនដែលពួកយើងបានរកឃើញថា អ្នកជំងឺនៅតែមានដានវីរុសកូរ៉ូណាក្នុងខ្លួន បើទោះបីពួកគេបានទទួលការព្យាបាលជាសះស្បើយក៏ដោយ។
លោកវេជ្ជបណ្ឌិត Zhao Jianping បានប្រាប់សារព័ត៌មាន Southern People Weekly កាលពីថ្ងៃព្រហស្បតិ៍ថា៖
រឿងនេះពិតជាគ្រោះថ្នាក់ខ្លាំងណាស់។ តើយើងត្រូវដាក់អ្នកជំងឺទាំងនោះនៅទីណា? យើងមិនអាចបញ្ជូនអ្នកជំងឺទាំងនោះទៅផ្ទះទេ ព្រោះពួកគេអាចចម្លងមេរោគទៅអ្នកដទៃ ហើយយើងក៏មិនអាចទុកអ្នកជំងឺទាំងនោះនៅក្នុងមន្ទីរពេទ្យដែរ ដោយសារតែវាជាកន្លែងប្រមូលផ្តុំទៅដោយមេរោគ។
នៅក្នុងបទសម្ភាសន៍ដាច់ដោយឡែកមួយជាមួយកាសែត Beijing News កាលពីថ្ងៃពុធលោកវេជ្ជបណ្ឌិត Zhao Jianping បាននិយាយទៀតថា៖
អ្នកជំងឺម្នាក់របស់គាត់ ត្រូវបានអនុញ្ញាត្តឱ្យចាកចេញពីមន្ទីរពេទ្យបន្ទាប់ពីការធ្វើតេស្តបានបង្ហាញថាគាត់មិនមានវីរុសកូរ៉ូណាទៀតទេ ប៉ុន្តែច្រើនថ្ងៃក្រោយមកអ្នកជំងឺបានធ្លាក់ខ្លួនឈឺ ហើយពេលនេះពួកយើងបានធ្វើតេស្តរកឃើញវីរុសកូរ៉ូណានៅលើខ្លួនគាត់ម្តងទៀត។
លោកវេជ្ជបណ្ឌិត Zhao Jianping បានបន្ថែមទៀតថា៖
នៅក្នុងករណីនេះ អ្នកជំងឺដែលបានទទួលការព្យាបាលជាសះស្បើយហើយ គួរតែនៅក្នុងផ្ទះដាច់ដោយឡែកឱ្យបានយ៉ាងហោចណាស់ ១៤ថ្ងៃ មុនពេលអនុញ្ញាត្តឱ្យចេញទៅខាងក្រៅ។
គួរជម្រាបដែរថា ក្រុមគ្រូពេទ្យជំនាញចិនធ្លាប់បានព្រមានថា អ្នកជំងឺដែលបានជាសះស្បើយ គឺអាចឆ្លងជំងឺនេះជាលើកទីពីរ ប៉ុន្តែនៅក្នុងនោះដែរ ក្រុមគ្រូពេទ្យជំនាញចិនក៏ហាក់នៅមិនទាន់មានភាពច្បាស់លាស់ ថាតើបញ្ហាទាំងនោះវាកើតឡើងដូចករណីដែលលោកវេជ្ជបណ្ឌិត Zhao Jianping បានលើកឡើងឬក៏យ៉ាងណា៕
Bong I.T