គួរឲ្យគោរពណាស់! Salah បានផ្ញើស្បែកជើងបាល់ទាត់១គូ ទៅកាន់ក្មេងប្រុសម្នាក់ដែលរងរបួសពិការជើងម្ខាងដោយសារផ្ទុះគ្រាប់បែកនៅស៊ីរី

ស៊ីរី៖ ខ្សែប្រយុទ្ធក្រុមហង្សក្រហម Liverpool កីឡាករ Mohamed Salah បានបន្តធ្វើរឿងគួរឲ្យគោរពសារជាថ្មីម្ដងទៀត ដោយកាលពីពេលថ្មីៗនេះ គេបានផ្ញើស្បែកជើងបាល់ទាត់១គូ ទៅកាន់អ្នកគាំទ្រវ័យ៨ឆ្នាំ១រូប ដែលរងរបួសដោយសារការវាយប្រហារគ្រាប់បែកនៅប្រទេសស៊ីរី។

ក្មេងប្រុសខាងលើត្រូវបានគេស្គាល់ថាជាជនជាតិស៊ីរី មានឈ្មោះថា Hamis al Gacir។ រូបគេបានរងរបួសបាត់បង់ជើងម្ខាងដោយសារការទម្លាក់គ្រាប់បែករបស់កងកម្លាំងរបស់លោកប្រធានាធិបតីអាសាដ នៅទីក្រុង Idlib ភាគពាយព្យនៃប្រទេសស៊ីរី។

Hamis បានរត់ភៀសខ្លួនចេញពីទីក្រុង Idlib ហើយ ខណៈបច្ចុប្បន្នគេកំពុងស្នាក់នៅខេត្ត Hatay នៅជិតប្រទេសតួកគី។

ក្នុងសប្ដាហ៍នេះ Hamis បានទទួលការដូដ៏មានតម្លៃមួយពីតារាបាល់ទាត់ក្នុងដួងចិត្តរបស់គេ គឺកីឡាករ Salah។ ជម្រើសជាតិអេហ្សីប បានផ្ញើជាស្បែកជើងបាល់ទាត់ ដែលមានជាប់ហត្ថលេខារបស់គេ រួមជាមួយនឹងរូបភាពកីឡាករ Liverpool មួយផ្ទាំង និងសម្លៀកបពាក់ក្រុម Liverpool ក្នុងដី១ឈុត។ ការផ្ដល់ការដូនេះ ត្រូវបានគេរាយការណ៍ថា ជាការលើកទឹកចិត្តទៅដល់កុមារា Hamis ដែលខិតខំប្រឹងប្រែងឆ្លងកាត់រឿងលំបាកកន្លងមក។

គួរឲ្យដឹងដែរថា នេះមិនមែនជាលើកទី១ទេ ដែល Salah បានជួយទៅដល់ជនខ្វះខាត កន្លងមកគេធ្លាប់បានបរិច្ចាគថវិការផ្ទាល់ខ្លួន សាងសង់សាលារៀន និងមន្ទីរពេទ្រនៅស្រុកកំណើតរបស់គេ។

មិនត្រឹមតែប៉ុណ្ណោះ កាលពីឆ្នាំមុន គេបានបរិច្ចាគប្រាក់ចំនួន៥សែនផោន (ឬប្រមាណ៦សែន៤ម៉ឺនដុល្លារ) សម្រាប់ជំនួយជាឧបករណ៍វេជ្ជសាស្ត្រដើម្បីព្យាបាលជំងឺមហារីកកុមារនៅមន្ទីរពេទ្យ ៥៧៣៥៧ នៃទីក្រុងគែរថែមទៀតផង៕

ប្រភព៖ AF