អីយ៉ាស! ស្ងាត់ៗ Leicester City ចូលចែចូវកីឡាករឆ្នើមម្នាក់របស់ Liverpool

អង់គ្លេ​ស៖ Leicester City ត្រូវបានរាយការណ៍មកថាបានទាក់ទងទៅកាន់ខ្សែបម្រើរបស់ Liverpool កីឡាករ Adam Lallana ដើម្បីជួបពិភាក្សាគ្នាជុំវិញការផ្ទេរមកកាន់កីឡដ្ឋាន King Power នៅពេលរដូវកាល ២០១៩-២០២០ ត្រូវបានបញ្ចប់។

កិច្ចសន្យារវាង Lallana និង Liverpool នៅកីឡដ្ឋាន Anfield នឹងផុតសុពលភាពនៅខែមិថុនាខាងមុខ មានន័យថាខ្សែបម្រើអង់គ្លេសរូបនេះនឹងអាចចាកចេញពី Liverpool ដោយមិនមានតម្លៃខ្លួននៅទីផ្សារដោះដូរកីឡាកររដូវក្ដៅខាងមុខ។

មានបណ្ដាក្លិបមួយចំនួនបានដាក់ការចាប់អារម្មណ៍មកលើ Lallana នៅប៉ុន្មានសប្ដាហ៍ចុងក្រោយនេះ ប៉ុន្តែបើតាមសេចក្ដីរាយការណ៍របស់ Sky Sports News ក្លិបជើងឯក Premier League ឆ្នាំ២០១៦ Leicester City ពេលនេះកំពុងតែតាមចែចូវកីឡាករវ័យ៣១ឆ្នាំរូបនេះហើយ។

បន្ថែមលើសពីនេះ ហង្សក្រហម Liverpool ត្រូវបានគេដឹងថាបានបញ្ជាក់ជំហរយ៉ាងច្បាស់ថានឹងមិនបន្តកុងត្រាថ្មីទៅដល់អតីតប្រធានក្រុមរបស់ Southampton ម្នាក់នេះនោះទេ ខណៈ Arsenal និង Tottenham Hotspur ក៏ជាបេក្ខភាពដែលចង់បាន Lallana ផងដែរ។

គួរឲ្យដឹងផងដែរថា កីឡាករដែលអាចលេងបានទាំងបម្រើកណ្ដាល និងបម្រើប្រយុទ្ធ Lallana រកបានគ្រាប់បាល់១គ្រាប់ និងបញ្ជូនបាល់ឲ្យមិត្តរួមក្រុមបញ្ចប់ទីបានសម្រេច២ដង ពីការបង្ហាញខ្លួន១៩លើកឲ្យក្រុមរបស់លោក Jurgen Klopp នៅរដូវកាលនេះ៕

ប្រភព៖ SportsMole