កូនគោចម្លែក កើតមកមានរូបរាងខុសប្រក្រតី ឃើញហើយគួរឲ្យអាណិត(មានវីដេអូ)

ឥណ្ឌា៖ កាលពីពេលថ្មីៗនេះ កូនគោដ៏កម្រមួយក្បាល បានសាងភាពភ្ញាក់ផ្អើលដល់មនុស្សម្នាជាច្រើន ហើយជាពិសេសម្ចាស់របស់វាផ្ទាល់តែម្ដង ក្រោយកើតមកមានក្បាលពីរ មាត់ពីរ និងភ្នែកបួន ។

លោក Bhaskar ដែលជាម្ចាស់កសិដ្ឋានមួយកន្លែងស្ថិតក្នុងភូមិ Paarasalai ភាគខាងត្បូងប្រទេសឥណ្ឌា និងជាម្ចាស់របស់កូនគោខាងលើ បានបង្ហាញពីអារម្មណ៍តក់ស្លុតជាខ្លាំង ក្រោយពីឃើញកូនគោរបស់លោកកើតមកមានរូបរាងខុសប្រក្រតី។

កូនគោដ៏ចម្លែកនេះ មិនត្រឹមតែមានក្បាលពីរ មាត់ពីរ និងភ្នែកបួនប៉ុណ្ណោះទេ វាថែមទាំងមានអណ្ដាតចំនួនពីរទៀតផង ដែលជាហេតុធ្វើឲ្យវាមិនអាចបៅដោះមេរបស់វាដោយផ្ទាល់បានឡើយ។ ទោះជាយ៉ាងណាក្ដី ម្ចាស់របស់វាបានមើលថែ និងចិញ្ចឹមយ៉ាងយកចិត្តទុកដាក់ ដោយច្រកទឹកដោះគោចូលក្នុងដបដើម្បីឲ្យវាអាចបៅជារៀងរាល់ថ្ងៃ។ ហើយបច្ចុប្បន្ននេះដែរ កូនគោ និងមេរបស់វាកំពុងរស់នៅយ៉ាងប្រសើរជាធម្មតា  ប៉ុន្ដែនៅថ្ងៃខាងមុខ ជីរិតរបស់កូនគោដ៏គួរឲ្យអាណិតនេះ នឹងទៅជាយ៉ាងណានោះ គេមិនទាន់ដឹងឡើយ។

ទន្ទឹមនឹងភាពល្បីល្បាញនេះដែរ កសិដ្ឋានរបស់លោក​​ Bhaskar  បានទាក់ទាញអ្នករស់នៅក្នុងតំបន់ និងភ្ញៀវទេសចរជាច្រើនដែលចង់ឃើញកូនគោដ៏កម្រមួយក្បាលនេះ។

គួរឲ្យដឹងដែរថា បាតុភូតនៃសត្វដែលកើតមកមានក្បាលពីរបែបនេះ គេឲ្យឈ្មោះថា «Bicephaly» ដែលជាពិការភាពពីកំណើត ហើយគេឧស្សាហ៍ឃើញកើតលើពពួកសត្វដូចជា ពស់ គោ ត្រីឆ្លាម អណ្ដើក និងបង្គាជាដើម៕

សូមទស្សនាវីដេអូខាងក្រោម៖